本來稔住上一篇【IT9@B4】三個月學好會計（三）就係呢個系列最後一篇。去年五月二十八日，我開佐個頭寫「三個月學好會計（一）」，先發現其實我根本就唔記得發生佐乜嘢事，真係只記得上回提到嗰三樣嘢。見去到琴日啱啱好一年，我想埋佐個尾佢，於是就的起心肝快快手靠自己「好可靠」既記憶寫埋佢，當了佐件心事。
就係我完全唔記得喺呢三個月學會計既時期，我係有寫日記架！！
如果我記得自己有寫日記，呢個系列就唔會寫得咁辛苦，因為我大部份既內容都係靠模糊不堪既印象加入有限既想像同推理能力堆砌出黎。
點解我忽然醒起日記既存在？因為我啱啱睇返自己寫既文，有少少疑惑——我無理由記得飛哥講乜架喎……點解會記得咁清楚……唔通我有寫低過？無理由我嗰時咁忙唔可能會有閒情逸致寫日記架……
但係我又無理由會記得咁清楚架喎，於是我就搵返當年既日記，先發現原來我喺呢個「三個月學好會計」課程寫佐好多日記。
我睇返日記，我先發現我同飛哥同ＰＫ既關係一開始都唔多好：auditing framework呢科入面好多字眼令讀engineering既我同讀law既飛哥覺得好混亂：工程系係計數既，所有嘢都量化，1就1，0就0；而法律既字眼就更加有清晰既定義。
但係，喺auditing framework入面，好多字眼都勁古怪：例如「usual fluctuation」代表「stable trend」。明明話係fluctuation，點解會係stable呢？我哋真係唔明先問，但係ＰＫ淨係話「總之對auditor黎講，usual fluctuation就係stable。」問多兩句佢就覺得我哋challenge 緊佢。
又例如，有啲題目係俾一堆情況你，問你佢哋既 risk level係高中低。如果得三樣嘢，我就識答你高中低。但係佢有六樣嘢，題目又無講係兩個高兩個中兩個低，定係一個高兩個中三個低……對我黎講，risk level係比較性，無絶對性，我點知你個高中低點定義先？你六個叫我排次序邊個最risky反而都make sense少少吖……問ＰＫ其實risk level個cutoff喺邊，佢又係解唔到，叫我哋背晒書入唔個表就得。
背晒就得，咁搵個小學生做audit都得啦，明明係有得計risk level但係佢淨係叫人背晒佢。
結果就係ＰＫ完全解答唔到我哋既疑惑，所以我哋根本就唔明自己讀緊乜，讀到好灰。飛哥應該好我少少，佢記性好都叫做死記到某啲資料，但係我由細到大都係唔明既話我就九成記唔到。
於是，果日同ＰＫ嘈之前，飛哥就話問黎都無用。依家睇返啲日記，見到我哋上堂問佐咁多問題佢都解唔到，我嗰時點解會咁白痴覺得對答案時追問會有用呢？
而喺我開始發問之後，過程並唔係我記憶中既我講完兩句就飛哥講晒，而係我哋兩個輪流發問（發炮）——因為我哋一來堅唔明點解啲答案係咁好frustrated，二來ＰＫ啲態度真係令人好難冷靜。
跟住既事我係完全唔記得——原來比較冷靜同成熟既飛哥喺我哋同ＰＫ鬥完交之後既小息，提議：「你當為佐個grade不如去同ＰＫ道歉啦。」
我當時都仲好嬲，於是話：「明明都無錯道乜鬼歉。我唔信佢可以咁就做低我個grade…」
飛哥：「其實我想同佢道歉啊，我哋一齊去啦。」
我：「唔去啊，我哋都無講錯，佢根本就解唔到。如果佢因為咁做低我哋個grade，佢根本無資格做教授。」
於是飛哥自己走佐去道歉，返黎同我講話佢幫我道埋歉。
嗰晚我好內疚，於是喺自己既網上日記除佐 ALL CAP 記低以上勞氣既事（竟然一句粗口都無寫過啊，淨係寫佐勁多「HOW COME!!!」），更重要係去到最尾寫佐段同飛哥道歉，因為我拒絶去道歉時既語氣應該好差下。
（當年大家都好興寫網上日記，會互share既，好多人用xanga，而我係因為之前做intern啲同事都係用easyjournal，所以我都用easyjournal。條link放喺ICQ入面既，所以好多朋友睇。同依家一樣，…
