上回：移居英國雜記(6)： COVID-19 會唔會搞到我無得簽約？
一直都無講返工返成點，係因為我一直未開工。
聖誕前，人事部同事電郵我同我confirm個offer，但係校長中佐COVID返唔到學校簽offer letter，開頭我以為呢個係我一直都未開到工既原因。
上星期五（一月七日），人事部同事打俾我，話：「我哋收到通知，個enhanced DBS check搞掂佐，張certifcate啱啱寄出，係寄俾你既，你留意信箱，一收到就通知我，咁我哋就可以定你個start date嘞。」
一日後，即係上星期六，我就喺郵差叔叔手上攞到呢張enhanced DBS check certificate：
收到之後即刻scan俾人事部同事。
星期一，人事部同事話佢要搞埋啲文件，兩日後再打電話俾我落實開工日期。
星期三，人事部同事打黎問：「搞掂啦，你可唔可以下星期一返工？」
我話可以。人事部同事話轉頭就電郵封offer letter俾我。
我好快就收到，入面寫埋開工日期，但係原來呢封係conditional offer letter，出信日期係十二月十六日，入面寫住：
我上一次返學校就係交晒啲資料做以上既verification，原來要CHECK咁多嘢！而需要最長時間既就係enhanced DBS check，我十二月十七日就交晒資料，過佐三個星期後先收到結果。所以，我一直等既其實並唔係校長簽名。
而校長除佐喺封offer letter度簽佐名之外，仲喺簽名隔離寫佐句Welcome to the team!! 雖然唔知係咪英國文化係咁，但都覺得好warm…
聽日終於可以開工，心情真係又緊張又興奮。其實呢一刻我唔知自己返工要做乜，想準備又唔知可以準備啲乜，人事部同事嗰日打嚟淨係叫我email張相俾佢整職員証，返工嗰日帶返DBS certificate正本，然後話下星期一見就收佐線。加上我本身可以搭既火車停駛，聽日要五點九起身搭巴士返工，依家又完全瞓唔著，所以記返低成個過程減下壓啦。
稔返，十二月十五日收到offer，一月十七日正式開工，咁又過佐一個月嘞……
同場加映：
係我收到通知正式開工之後唔夠一個鐘，我收到以下既電郵：
呢間學校我係同請我嗰間同一日申請架！點解可以慢咁多。同埋人事部封電郵一睇已經唔太友善：嗱我下星期就見你，不過就未知邊日，我哋建議你留晒成日。（你唔講邊日，咪即係要我成個星期留俾你？）
我好官腔咁覆返佢多請佢哋既機會，不過我已經收到另一間學校既OFFER。
之後佢哋係完全無回覆！呢間學校個人事部睇嚟真係麻麻。雖然呢間學校既福利同人工都好啲啲，但佢哋人事部既效率同對求職者既態度，令我覺得應該都唔係咁好做……
