續上回：移居英國雜記(5)： Certificates of No Convictions (CNCC)真係好貴好煩！
我經過深思熟慮，決定都係俾貴啲做CNCC，因為英國兒童工作都好注重safeguarding（safeguarding呢個字好緊要，我見兩份有關兒童既工作，兩份都有問我有關safeguarding既嘢。如果你準備見同細路仔／有特殊需要既成年人有關既工作，記得做足功課），我估無做過CNCC每次要同新僱主周旋都好煩，做過一次既話，如果僱主想要最新既CNCC，我估可以解釋點解唔需要再做。而且，第一份工，乜都唔知，都係唔好煩住人事部好啲。
講返份工，其實學校係未同我講我幾時正式開工。上星期五我去學校，人事部同事影印晒我啲文件同話會幫我申請做enhanced DBS checked同準備學校信俾我申請CNCC，同埋話黎緊個星期，學校就會正式出Offer letter俾我。
離開佐學校，我先醒起，其實我仲未知start date係幾時，於是稔住返到屋企再email人事部同事問。點知我返到屋企，除佐收到enhanced DBS checked既資料同學校信，仲見到人事部同事話自己今日其實已經開始放假，到一月四日先會覆電郵。
學校亦都係一月四日開學，咁到底我一月四日駛唔駛返工呢？咁我唯有等學校出Offer letter俾我啦。
結果，我今日收到學校人事部高級同事通知我封Offer letter要開學之後先可以俾我，依家電郵俾我係想同我確定係有Offer俾我。至於點解仲未出到Offer letter？
因為校長中佐COVID-19簽唔到Offer letter啊！
估唔到因為COVID-19，我要下年先可以簽約。我問人事部我一月四日駛唔駛返工，佢話唔駛住，一月四日佢哋會再搵我update下情況……
因為COVID-19，已經開始有消息下年可能要轉返learn from home，到底我最後簽唔簽到約呢？
題外話：英國呢邊COVID-19真係幾勁，我已經識幾個英國朋友中佐，不過因為全部都打佐疫苗，所以都係家居隔離自己休息。我截至上星期五，未中（touchwood ），因為入學校前都要做測試……因為呢邊爆得真係幾勁，加上我相信學校算高危，所以我去完學校都walk-in打佐第三針。
結果校長都中佐，學校果然係一個危機四伏既地方。
