其實我唔想寫屋主過身——雖然已經過佐三個月，我都仲有時有啲唔開心，有時打開門，都會稔起佢同我講how’s your day。
但間中掛住佢係一件事，佢過身之後真係太多嘢煩到我，最近一單前日，八點起身，發現上唔到網。
手機同電腦都上唔到網。
我假假地都讀過電腦，咁就梗係走去reset下啲router同modem，但係都唔得。
之後我就稔，會唔會係前屋主細佬無交上網費呢？於是我就whatsapp問佢有冇交錢。
佢叫我睇下個電話有冇問題。屋主喺廳個電話舊到啲膠制黐𣲷𣲷仲要甩色，我都唔想掂佢個電話。我叫前屋主細佬打電話黎，佢叫我就咁攞起個電話聽下有無聲。
我心稔，乜唔係一定有聲既咩……
不過我都照聽，而又真係有聲。我想試下打出，但係打極都打唔到。我仲以為係自己唔識用佢個電話。
我同屋咁啱落黎，我問佢知唔知屋主個地線電話，因為我得手提，佢話佢有，於是佢試下打電話，就發現個電話打唔到。
屋主細路話佢十一月已經叫佐遺囑執行人Ｅ（executor）交錢，但係個遺囑執行人真係好慢。佢叫我打電話俾律師行。佢話佢都會打俾律師行，因為佢都有嘢趕住搵佢哋。
老老實實，Ｅ俾我既感覺真係好廢，覆電郵又慢，做嘢又無乜手尾。我都唔係咁想搵佢。
但係無得上網真係好大鑊，尤其就快聖誕節我仲約佐啲香港朋友zoom，同埋無得上網雖然好大鑊，但係都唔夠斷水斷電咁大鑊，唔搞清楚佢哋究竟有幾多費無交，真係有生命危命。所以唯有死死地氣打去律師行。
打去律師行，接線生話Ｅ九點半先返工。
我唯有用手機send封題目係：緊急：上網服務中斷。
過佐一陣，我再試連上網，見到以下既訊息：
講返點解我對Ｅ既印象咁唔好，因為佢真係好無交帶，好無手尾，佢成日叫我哋俾嘢佢都講得唔清唔楚，問佢嘢佢又要幾日後先覆。好似之前佢問我哋可唔可以幫手俾啲房產鑒定員（surveyor）入屋估下價——因為屋主細佬要交遺產稅。佢真係淨係問可唔可以幫手，完全無講幫手係要做乜，要幾耐……大佬，你叫人幫手，係咪應該講清楚我要做乜先？
