今日同同事吹水，傾傾下講起亞洲學生同英國學生數學能力既分別。呢個現象喺敝校好明顯。
敝校亞洲人唔多，加上我通常只會出現喺有好多特殊學習需要學生既班，雖然敝校既學生背景統計話有大約１０％既亞洲人，但平時真係唔多見有亞洲人，只係間唔中係走廊遇到少少亞洲人臉孔。我唯一一個香港學生都係讀普通班。直到最近，我因為好想八卦一下數學精英班學生既能力係點，趁空堂去佐中四精英班，入面竟然有一半亞洲人！
同事：「你覺得用算盤會唔會係你哋數學叻啲既原因？」
我呆一呆：「呃……其實我哋唔係好多人識用算盤。」（我咁啱識，係因為我阿公教過我。我反而唔知點解我會識算盤既英文……）
同事驚訝：「吓，我去過一個講座，個講者話香港小學要學算盤，我以為你哋全部都用算盤上數學堂。」
我稔佐一陣，佢喺咪講緊香港有段時間好興既珠心算：「唔，係有一個課外活動可以學算盤，但係唔係人人都會學……好耐好耐之前可能真係人人都要學算盤，但係我讀書嗰陣都唔駛學算盤。」
同事：「咁即係你哋唔係全部人都識得用算盤？」
我：「應該大部份都唔識，其實我估好多人都無掂過算盤。我識都係因為我阿公教過我，佢係用算盤計數既。」
同事：「啊……即係我俾人呃佐好耐。」
「亞洲人」或者「中國人」數學叻其實都係一個種族定形／刻板印象（racial stereotype）。因為數學叻係優點，所以無人會話係種族歧視。但係，英國因為好強調種族共融，所以啲仔成日都會話人哋「racist」。有次有個學生問我早餐係咪食炒飯，我都未答，隔離個仔鬥佢「你唔可以咁問架喎，你咁係racist！」
講返數學叻，我唔敢其他亞洲地區係點。我覺得所謂香港數學叻只係因為我哋心算能力好佢哋都幾多下。大部份香港人都識得背乘數表，佢哋大部份都唔識背，你問一個學生八乘七係乜，好少少既會由八乘一開始默念到八乘七，但大部份都話要計數機，或者睇返手冊入面個乘數表。
同時，我哋識廣東話真係贏在起跑線：廣東話數數字目字，一音一字；佢哋幾音一字，去到十以後特別名顯，例如77，我哋只係「七—十—七」，佢哋係「se-ven-ty-se-ven」，三個音同五個音既分別。
到要背乘數表，例如7X7=49，我哋係「七—七—四—十—九」，哋係「se-ven-ti-me-se-ven-is-four-ty-nine」，一音一數字，我哋背九因歌其實真係易好多，名副其實贏在起跑線。
黎英國之前，我以為英國教數會強調思維訓練多過操練，但係呢度最大問題係又唔駛佢哋背乘數表，但係又唔會教佢哋真係稔下一題數可以點計得快啲，只係不定咁示範（modeling）一個既定既方法，我本來以為因為我支援既都係能力比較弱既學生，但係我最近去啲比較好既班，佢哋都係教啲學生跟足步驟，有時見到佢哋咁教，我真係覺得好匪夷所思。
咁到底香港教數係咪好過英國呢？我又唔肯定，因為一來，我淨係讀過一間香港中學，又淨係教過一間英國中學，二來，我完全唔記得中學嗰時老師係點教數學，我淨係記得我同幾個同學自己係度計晒啲數，同做啲深過我哋程度既數學。咁當年我都係學校奧數既成員，老師又應該係唔理我哋上堂做乜既。
同埋，所有學業有關既項目，亞洲人都係特別緊張，特別信「萬般皆下品，唯有讀書高」，所以其實都唔係淨係數學。
