申請BNO-visa，第二煩：照肺。
約照肺，要一千蚊，仲要等一個月先有期。但好明顯供不應求，就算佢收二千要你等半年都無計。有啲人仲話唔係好多人移民，唔該你面對現實啦。
不過呢個係時間同金錢解決到既煩，所以未算最煩。
對我呢個超級無記性既人黎講，最煩係申請表要你填返過去十年旅遊記錄，問題分個三部份，問你唔同地區既資料。我完全唔記得自己幾時同去過邊啲地方，而我本身已經唔算去得多旅行既人。
我有個朋友，COVID-19前，佢係唔會有兩個月連續喺香港——因為佢成日都去旅行，佢阿媽曾經嬲到要脅話要收埋佢本護照，佢仲話：「你未收囉，我去攞過本有幾難……」
最近，佢阿媽串佢：「你呢年幾一直留喺香港，我覺得好唔慣啊。」
雖然，我本身都唔算去得多旅行既人，但係因為近朱者赤，識佐佢之後，同佢去過幾次旅行，亦都去得多佐旅行。
開始填表既時候，我仲大安旨意，稔住護照有晒記錄，無問題啦。點知到真係填既時候，我先發現，原來入佐歐洲境之後，再去其他歐洲地區根本唔駛吸印架。
而更大鑊既係，去台灣直程無吸過印！（我一早就無回鄉証，所以好肯定自己無返過大陸。如果唔係，去大陸都係無記錄既。不過大陸算唔算外遊呢？咦，台灣又算唔算呢？都係唔好再稔……）
填申請表第一部份，就要填過去十年去過幾多次澳洲／加拿大／新西蘭／美國／瑞士同歐洲經濟區。
幾多次係點計既呢？我試過有一次旅行就去佐英國、維也納、德國、捷克再返德國，咁係記一次，三次定四次呢？（自己答：四次。英國唔記，德國計當兩次。）
好彩，超過六次淨係要揀「六次或以上」，咁計埋美國加拿大我應該點都超過六次既。
之後難題就出現嘞，佢要你填最近兩次去邊，同去佐幾多日。最近一次都好啲，我係只係去芬蘭所以有吸印。
但係尾二嗰次我就係去佐好多地區，邊記得最尾喺德國幾多日喎，我淨係記得最尾嗰日去佐集中營……
因為去德國嗰次要寫留德國幾耐，而我哋中間去佐捷克，出入境又無記錄，所以我完全唔記得自己留佐喺德國幾多日。我又搵極都搵唔返自己嗰年既記事簿，搵機票火車票又搵唔到記錄，我懷疑係我朋友負責晒所有嘢所以我連電郵既記錄都無……
最後唯有放棄，試下問朋友會唔會記得。
朋友果然係成日去旅行。佢有一個excel係記錄晒自己去過邊度同所有行程！佢好快就check到話返俾我聽：我哋最尾嗰程留佐喺德國兩日。
好彩佢淨係問最近兩次咋，再多啲我都唔知點填俾佢。
第二部份就係除佐第一部份既地方，同英國外，全世界你去過其他地方既所有記錄。
呢個先係最大鑊，因為佢要你寫晒所有地方，仲要出入境既日期添。
因為我完全唔記得自己去過幾多次台灣，我淨係覺得自己去過好多次。所以我就順便問埋我呢個朋友：「咁你記唔記得我同你去過幾多次台灣啊？」
朋友：「吓，你無同我去過台灣喎！」
我：「點會無啊？我哋仲去食蟹粥。」
朋友：「你無同我食過啊，我同Eric Jenny去食之後send相出黎，你後尾同你第二啲朋友去台北，我send地址俾你咋。」（我同呢個朋友同Eric Jenny四個係去過幾次旅行既。）
我：「無理由你同Eric Jenny成日去我無去過架？」
朋友：「我哋去親都係兩日一夜，最多三日兩夜，問親你都話太短時間唔去。」
佢咁講，又係喎。我係唔會咁豪飛台灣淨係留三日架，而因為佢哋成日喺個group度send相，等我仲有假既記憶，以為自己都去過好多次台灣。稔落都好抵，無去過以為自己去佐。
