PGDE課程安排我哋去一間同我來年任教學校「相似」既學校實習一星期。不過我唔知佢地所謂既「相似」係指邊方面，因為我之後教既係男女校，但係佢叫我去一間男校實習。
點解要去另一間學校實習？因為我哋應該唔會再見到嗰班學生，所以我哋可以無心理包伏咁試下喺PGDE入面學到既理論。
＊＊＊
實習第一日叫做有驚無險咁安然渡過。驚既係一開始，我同另一個都係電腦科既實習老師阿Ｐ坐喺臨時教員室度等佐三堂都無人理我哋，後來先知安排實習既職員唔知間學校既電腦科係同商科夾埋，所以商科老師嚟帶走啲商科實習老師既時候佢哋無叫埋我哋去。第五堂佢哋已經叫我同阿Ｐ試下帶活動。我同阿Ｐ都叫做有教過書既實戰經驗，所以無驚無險咁順利完成。
實習第二日，我哋個Mentor叫我哋第一堂去班主任節，睇下佢哋平時班主任節係做乜嘢嘅。同敝校一樣，班主任節一開節就係檢查學生有冇帶整文具同閱讀課用既書。之後就有一堆校務宣佈，例如暑假學校有烹飪班，幾時派成績表等等。
班務完成之後，班主任就播片，叫同學安靜留心睇片。
我一睇，呆佐，竟然係「An Update On Hong Knog」。
然後聽到「I am xxx in year 11 and I would like to share with you an update on Hong Kong…」流利既英語配上非常熟悉既香港學生口音，我有一種難以形容既感動。
之後香港學生由台灣殺人事件講起，講我哋上街，去立法會，再去到最近禁榮光，禁羊村事件，剪片非常專業，好多片我「發夢」都見過，我個心隱隱作痛。到佢激動咁講 「how ridiculous that a country could be affected by a song or a comic? 」我忍唔住流淚。
然後佢播榮光英文版：
我好努力咁忍佐好耐，但真係忍唔到，眼淚不停咁流（我寫呢篇文都流緊淚），因為我無紙巾，咁啲眼淚就滴晒喺枱面。一來，腦入面不停浮起發夢既片段，二來，呢段片喺香港中學根本就唔播得，學生同老師都會俾人拉，你話幾令人傷感同擔心。不過，我真係估唔到自己個傷口咁深。或者係因為一啲心理準備都無，所以我先有咁大反應。
然後坐我隔離一齊實習既阿Ｐ都喊埋一份。阿Ｐ係土生土長既英國人，後尾佢同我講睇完條片感覺到我喊，就知我係香港人，好大機會係因為片入面講既原因過佐黎英國，覺得我同個香港學生都好堅強…
