我做LSA既時候每日都有一堂我係要變身做老師，所以都要罰學生留堂。我既經驗係，罰男仔留堂，佢哋轉個頭都會同你做friend，但係罰女仔留堂，佢哋真係記好耐。
最深印象係我教中二時，聰仔一入課室無耐就忽然大聲叫喺佢後面個小奇（有過度活躍症）「shut the fxxk up」，因為小奇係佢後面依依哦哦唔知講乜。
好老實，小奇真係超級抵鬧，佢喺課室都真係樹敵無數，我有時心入面都好想叫佢「shut up」。不過，作為老師，都係要罰講粗口既聰仔留堂一小時。咁當然，我都警告佐小奇。
補充資料：我間學校，一堂入面收三次警告就要扣操行分兩分留堂一小時，有啲學校係兩次就留堂。不過講粗口係屬於較嚴重既行為問題，唔駛警告直接留堂。如果係用粗口鬧老師仲大鑊，扣操行分五分同即時去反思室一日。
另外，校規係學生喺課室入面係一定要除大褸（唔係校褸，喺啲勁大件既冬天褸），除非嗰日真係好凍；而除大褸係一件好緊要既事 — — 校長喺外面經過見到有學生未除褸係會即刻亂入課室叫佢除褸；我俾人觀課既有待改善一欄就係要學生除褸。其次嗰次都有少少無奈，無除褸既學生喺觀課前五分鐘先情緒大爆發，我係無可能叫佢除褸……
因為聰仔掛住同小奇嘈，一直都未無除褸，所以我見佢冷靜佐之後，就提佢要除褸，佢玩嘢加挑釁語氣：「老師，我唔識除，你幫我除吖。」
啲學生即刻乘機起哄話佢哋可以幫手除。
我唯有舉手示意要學生安靜。等到成班安靜，我話：「如果我係教緊幼稚園我就會幫你，依家我俾一分鐘時間你除，你除唔到我就要on call你（即係叫當值老師帶佢走去反思室同扣操行分五分）。
英國好多學校都係如果老師舉手，就全班都要即刻安靜同舉手回應，連老師開會都係咁，我第一次開職員大會，討論緊既時候，校長舉手之後我哋全部都舉手同三秒內靜晒，好有效，但我覺得都幾搞笑。好難想像商業機構會咁。
聰仔之後仲係度玩嘢話唔識除，但係我唔理佢繼續上堂，佢一分鐘之內都真係除佐褸。
同一堂，仲有個女仔阿晴上堂除佐自己隻鞋掉向小奇 — — 佢話小奇猛向佢做鬼臉 — — 所以我要有罰阿晴留堂。
落堂之後，聰仔不停咁求我唔好罰佢留堂俾多次機會佢，我話唔得，同趕佢去下一堂，提佢佢再唔走，遲到又要再罰留堂，佢仲死纏猛叫我俾次機會佢。而因為我要喺行為系統度做兩個留堂記錄，要啲時間處理入資料，轉堂得五分鐘，即係我執得嘢黎得一兩分鐘做記錄之後要跑去下一堂個課室，趕到嘔，所以我唯有扮惡咁趕聰仔走。同時，下一堂個老師都入佐嚟課室，於是佢都幫我手趕佐佢走。
但係咁啱佢之後嗰堂數學堂，我都喺度幫另一個學生，於是，每次我喺佢隔離行過，佢都細細聲咁叫我俾次機會佢。最後我都係要出殺手鐧：「你再講我就要俾警告你㗎啦」佢先無再煩我。
第二日上堂，聰仔喺度依依哦哦咁投訴我琴日罰佢留六十分鐘堂，最後我都係要好嚴厲咁同佢講「係你講粗口，同埋你亦都已經留佐堂，唔好再埋怨我，唔係我就要警告你」佢先收聲。
之後同一日放學搭巴士，我坐門口，佢落車見到我，我仲稔佢一定會又依依哦哦或者扮見我唔到。
點知，佢竟然向我微笑揮手：「 Miss, you are here too! See you tomorrow!」佢既語調仲要係好開心。
就好似喺學校乜事都無發生過！！！
後來我發現，大部份男仔都係咁。我做佐一年半，罰過一個男仔去反思室，而呢個男仔其實都好多行為問題，但係佢喺街見到我都會好開心咁同我揮手打招呼。
反而阿晴係我罰完佢留堂之後半年，我都唔記得佐呢件事既時候，有日佢又情緒失控，我安慰佢既時候佢忽然話：「我知你唔鐘意我，你罰過我留堂！」
後來我同另外既老師傾開，佢話：「係啊，女仔真係好記仇架，有個女仔佢中七畢業，問我記唔記得我喺佢中一嗰時罰佢留堂啊……」
所以，真係唔好得罪女人啊。
我轉佐場去patreon：https://www.patreon.com/0ce，如果你鐘意睇我寫既文，希望你可以支持下。我會寫「無牌老師」既經歷，每星期都起碼寫一篇文。同時都會整理返做learning support assistant時既經歷放喺patreon。
patreon見！
