當年入Big 4做電腦審計，部門全名為「資訊科技風險諮詢」。雖然部門叫風險諮詢，但敝公司始終係審計公司，所以主打還是做審計，而風險諮詢服務當年只是正在發展。甚至連公司大部份同事也不知道我們這個部門的存在。
部門裏大部份同事都是在外國讀過BBA或master的資訊科技之類的科目，主修計算機科目（computer science／computer engineering之類）既同事，計埋我一隻手既手指已經數得晒。不過，諮詢服務既項目比較少，又比較小型，所以人手都叫足夠。同時，因為我係部門入面唯一一個啱啱畢業既人，最抵駛（時薪最低），所以長期爆鐘，頭兩個月都無機會了解風險諮詢其實係做乜嘢。
到第三個月，負責風險諮詢項目其中一個經理打俾我，話聽講我啲programming好勁……
做電腦審計其中一樣會做既嘢係對下個客啲程式有無計錯數，你可以用手計，但係有時複雜啲就要計好耐，例如計下借錢每個月還幾多息幾多本金咁。呢啲時候，我就會要寫程式去試客戶個系統有冇計錯數，而寫呢啲程式其實好簡單，對所有正常咁讀過計算機工程既人嚟講一定係卓卓有餘：基本上就只係需要稔清楚啲數係點計，然後就可以寫做程式。
但係對啲無讀過programming既同事黎講，本身寫program就已經唔易，於是我就變成佢哋心目中programming好勁既人。
好慚愧，其實我寫program唔叻，當年做FYP（Final year project)，同我同組三位同學既programming都好勁，有一個仲係dean list兼後來讀埋PhD in Computer Science，佢哋依家全部都仲做緊同電腦直接有關既工作，而我係成組人入面最廢嗰個——我寫algorithm（即係稔啲步驟去解決問題）係 OK既，即係我可以稔到啲計算時間短啲既方法，又或者一啲簡單方法去解決一啲睇嚟好複雜既問題。但係揼 code係我既超級弱項，當年無google，好多時我又唔記得啲 syntax又成日搞佐啲 library又記錯 variable名……即係一邊寫 code一邊製造無數既 bugs。
加上當年電腦其實仲係好慢， debug同 compile都會花好多時間，所以，去到 FYP最後兩個月，我幾乎淨係寫英文：program documentation, poster, powerpoint, presentation既稿同final report。好正常，我寫 program要花佢哋一倍既時間有時仲要佢哋幫手搵 bug，而佢哋寫英文要花我一倍既時間之餘我仲要幫佢哋執返啲英文。
所以，去到最後，我其實係寫英文多過寫program好多，都有啲對唔住份FYP個A。
我即刻話自己唔係勁，只係識少少。經理問我識唔識寫C++（一種程式語言），我話「都算識既」。
