由紐約返港後，幾日後就被公司派佐我去韓國公幹。因為非常倉促，連香港生活都未重上軌道——嗰時講廣東話都仲要loading，紐約啲箱又未運到返香港 — — 就要做一個我從來未做過既項目，寫幾年都無寫過既C++。所以開頭喺韓國完全無寫日記，到後來，又要準備報考心理學課程，自修一本六百幾頁既心理學入門書，就更加無時間寫日記，結果記性極差既我其實完全無印象喺韓國係點開始發掘唔同既咖啡文化。
於是，呢篇談咖啡（四）一寫就寫佐接近兩個月，仲要寫個job多過寫咖啡，有少少掛羊頭賣狗肉既感覺……其實我稔過唔放入嚟萃取 / 品嚐個publication度，不過為佐完整性，都係放佐入嚟。
講咖啡之前，首先要聲明，呢個韓國項目係百年難得一遇既筍job。做佐六年幾，當年部門入面最鑊既job我做過晒，但係我唔敢話有邊隻係百年一遇既鑊，因為我相信一鑊還有一鑊甘。不過，我好肯定呢個韓國job係百年一遇，為佐大家唔好俾呢篇文既游閒生活令你有錯覺以為出差都係咁筍而誤上賊船，我一定要講解下點解呢個job係百年一遇。
首先我哋好少會連續幾個月到外國出差（我政治正確架，當年經常要連續幾個月返大陸……不過依家公司喺大陸既人手已經非常充裕，所以應該真係無乜機會要連續離港出差幾個月）。敝公司在外國通常都有分部，而如果當地真係無分部，又或者無接到job既人才，都唔會搵香港員工出差，因為香港員工成本其實算高。
我哋公司喺韓國有分部，但係韓國應該無人識做呢類項目。嗰個項目係精算部幫保險公司做預測唔同既投資組合既回報。精算部寫完個程式，但係因為涉及大量數據同埋運算上比較複雜，而當年啲電腦又唔夠勁，於是行得好耐，可能要成日甚至幾日先做到預測。投資巿場成日都有波動，分分鐘預測完某啲數據已經過時……於是，為佐減低預測既時間，佢哋搵我哋個部門做distributed computing——即係將運算程序分配俾唔同主機做唔同既工作，加快運算速度。我稔依家做呢啲嘢應該簡單好多，一來依家啲電腦勁好多，二來依家已經係cloud computing既年代，不過當年就都幾煩吓，加上啲distributed computing 既library好似廢廢地，又或者其實係我廢廢地，所以搞佐接近半年先搞掂。
呢類堅要寫程式既工作，分分鐘敝公司IT部既同事做會快好多。我都唔知點解最後搵佐我哋個部門做，或許係始終我哋先會對客掛。當年我算係做資訊保安為主，間中又會寫下少少script，而部門其他經理級既同事都唔識寫program，於是，喺美國返香港無幾耐就俾老細叫我帶住兩個主修電腦既同事幫手睇呢個項目。
本來因為budget問題，我主要都係喺香港，稔住都係去韓國開一兩次會咁。但係當年既網絡通訊無咁發達，精算嗰邊發現用email同打電話傾好難，而且我哋又好難遙距測試程式，搞搞下我就變佐要留守首爾。依家科技咁發達，應該真係唔駛洗錢要一個人留守喺度做測試，所以我幾肯定呢個去韓國項目就算我唔係離開佐Big…
