請先看前兩集：誤入Big 4（上）; 誤入Big 4（中）
呢篇遲佐好耐先出到，主要原因係我其實完全唔記得收到offer letter既情形。我搵佐當年既日記好耐，都搵唔到相關記錄，即係我當年無記錄過。唔通係嗰排好忙，無時間寫日記？但係我好多時點都會用Pocket PC寫一兩句，嗰排我都記過啲無聊到爆既事，例如買完飯攞返位成個tray跌佐要買過，將成個杯麵倒佐落keyboard等，好彩嗰時唔係用notebook。
由此可見，當時既我覺得倒瀉食物比收到offer letter更值得記錄 — 而我其實好論盡，成日都倒瀉／打爛嘢。
所以，我真係唔記得過佐幾耐，亦唔記得係點樣知，可能有電話或者電郵通知，又可能無，總之收到offer letter。有冇寫幾錢人工？唔記得。（我估無，下面會解釋。）我連知道有offer嗰刻嘅心情都毫無印象。
事隔十五年，依家淨係記得個offer好似喺12月尾出，如果要offer就2月28日前要回覆。
趕緊final year project既我，應該係將封offer letter 放埋一邊，然後就忘記佐件事。雖然知我去interview既人好多，因為engine仔著suit上堂只有兩個原因：上莊或者見工，Last year無理由仲上莊，而十月就著suit，喺一眾掛住做Final Year Project（FYP）著到不能再hea既engine人當中，十分突出。再加上我之前份summer intern，好多同學都以為我打算投身商界。但係大家都趕功課，又無其他同學見Big 4，無乜人知道offer已出。所以，除佐我啲FYP戰友，同編委會莊友（讀BBA既莊友有報Big 4），無人知我有offer…
但喺最後一個semester，2003年1月2月期間 ，FYP進入最後階段，我哋除佐上堂之外就匿埋喺lab差唔多與世隔絶既時候，發生佐一件改變一生既事，唔知大家估唔估到係乜嘢事呢？
SARS爆發。
SARS對唔少香港人嚟講係一段傷感既集體回憶，但對我哋一班趕緊FYP既學生，只係覺得「大學為佐減低風險，大部份堂都唔駛上，正啊」，因為可以日日匿喺lab到揼code（揼code = 寫program）。嗰時只係開佐最後一個Semester 一兩個星期，有個印度教授驚到返佐鄉下，嗰科本書成八百幾蚊，結果一頁都無睇過，考試淨係考返entry level course既嘢，so sad.
香港當時愁雲慘霧，但係我哋趕工趕到不見天日，新聞又無乜時間睇，淨係成日亂咁嗡，例如話如果我哋其中一個人有SARS，咁就一定會一齊死；又話如果交佐FYP之後即刻死佐就好唔抵。（當年真係好低能。）
去到二月中，忽然阿媽打電話黎：「永安頭先打黎問你收唔收到佢哋封信喎，話請佐你叫你記得月尾前要覆。」（嗰時未有whatsapp，所以大家都仲會打電話。）
