第二又二份一回：談咖啡（二）X 【IT9@B4】三個月學好會計（二又二份一）
上一回好抱歉，同第一回隔佐差唔多一年先寫完，仲要寫得好短，因為「死」呢個題目真係好難寫……
相反，ＰＫ真係好易寫，一開始寫就停唔到，所以呢篇長返好多算係賠罪。
不過寫寫下，我覺得有必先講下俾我累到科Auditing framework都得D既Law友「飛哥」係乜料先。（幫飛哥稔個化名真係好難，我本身稔既佢用佐黎做筆名——係啊，佢好猛料，寫文寫得多過我好多好多，份工又忙過我好多好多，仲搞好多壇嘢，例如podcast啊講座啊，真心勁。）
話說呢個「三個月學好會計」係所有入敝前公司做auditor而唔係主修會計既人都要讀，成班大概有40人，來自五湖四海：大約一半人係喺香港讀大學，有啲係內地大學，亦有外國名牌大學。雖然大家都唔係主修會計，但大部份係讀BBA——BBA有好多唔同既主修，不過我唔識分。讀完全同business無關既人一隻手數得晒：讀計算機工程既我，同兩個讀法律既同學。
四十幾人一齊上堂，一齊轉課室，一齊做功課，一齊放飯，好似返返中學咁。咁好難四十幾人一齊去食飯同做功課，於是，好快就有唔同既小圈子產生：外國讀書既兩三個圏，內地學生一個圏，香港學生又兩三個圏。當然，圏同圏都會有交流。通常喺一科完同另一科開始之間，我哋會一齊去唱K，poly附近既尖東當年好似有間neway，仲一定會唱「無間道」 — — 三年又三年吖嘛。（我哋同公司簽佐死約要做足三年，唔係要賠錢。）
其他日子，大家晚晚放學都要趕做功課做project，好自然都係細圏子眾埋既次數多好多。而且，同學對會計認識既程度都係有差距 — — 有business background既人，自然讀得無咁辛苦可以去玩多啲。其中有一個圏子既人都係外國返黎，據聞佢哋成日去clubbing。
因為我同飛哥都係完全無讀過同商科有關既科目，連credit同debit都唔知係乜，先天不足，所以我哋迫住要將勤補掘，唔好話clubbing，連功課都做唔切。而我本身喺科大認識既同學仔就好好人所以我就梗係搵佢求救，所以我哋就比較熟啦……
以上原因其實係我估既，嗰排既地獄生活，鬼記得四十幾人最後我哋點解會咁熟。我本身同科大同學因為副修哲學間唔中都會同哲學老師約食飯「哲學有偈傾」，所以都算熟熟地，但係同到飛哥熟真係好神奇。飛哥份人本身好 sociable，所以佢同好多人傾到計，佢應該同好多人都可以好熟。
我，科大同學仔同飛哥唔夠兩星期就成為一個戲稱「鐵三角」既組合。因為我哋通常都一齊坐一齊做 project。咁大個人返學係無坐位表既，但我哋通常都會一齊坐，契機係經常測驗考試。因為個課程好趕，所以老師對於「出貓」都係隻眼開隻眼閉。於是，部份人會參考課本同互相對答案。咁啱我哋三個都唔想出貓，所以我哋坐埋一齊費事阻住其他人交換答案。
我唔出貓某程度係因為童年陰影。至於我呢兩位朋友，我稔佢哋唔係有乜陰影，又唔係講乜道德高地，佢哋只不過係覺得無謂啫，張cert 都係攞嚟做報會計師牌既入場券，一來「求學不是求分數」，二來，其實真係合格就得。咁我哋公司又係理大既米飯班主，基本上唔係太離譜佢哋根本就唔會肥你，因為肥佐要補考仲煩。唔同中學，大家唔會因為你唔出貓話你唔合群，尤其我哋又唔係乜嘢高材生，可能佢哋抄我哋仲低分過自己做。
（Disclamer：我唔係話全班四十幾人得我哋三個無出貓，我相信好多人都無出貓。）
就係咁，我同兩位group mates越黎越熟 — — 大佬，日日朝九晚六對住，好難唔熟。印象中ＰＫ呢一科已經係課程尾聲，所以我同飛哥雖然只是識佐兩個月，但係我哋基本上係一齊讀晒成個會計學士程度既課程，感覺上就識佐年幾……
ＰＫ呢科有一次測驗係測MC，派返啲答題返黎，我同飛哥都錯佐同一條，而我哋都覺得自己個答案無錯。條題目係問乜我已經唔記得，但係就係嗰類：
