【IT9@B4】一星期OT 92 小時

思然 oce
5 min readAug 4, 2018
Photo by STIL on Unsplash

最近大學要填timesheet,令我回想起在Big 4篤鐘食鐘的日子。

Timesheet,係一張用黎記錄你一星期工作時數既表格,記錄時數呢個動作,我哋叫做「篤鐘」。理論上一個星期做40個鐘,所以就要篤起碼40個鐘。但係鐘呢,就唔係實報實銷既,係要跟返個客傾掂佐既budget,所以無論你實際上做佐幾多個鐘,你都只可以篤senior/manager同你講既鐘數,而通常喺開job(做新project叫開job)之前,你就知自己呢個job總共有幾多個鐘。

做會計審計既同事,因為多嘢做,所以好多時一個客都做幾個月,一俾senior book就以月計,有啲大客甚至可以做成年,所以會計審計既同事唔係好駛理鐘既問題(好似係)。

但係我哋做電腦審計,當年主要都係檢查下啲權限設定同啲程式設計之類,大啲既客可能都有100個鐘(兩三個星期),細啲既客可能得8個鐘,至於你實際要幾多時間呢,係無人會理嘅。咁如果senior話你可以篤8個鐘,但係你做佐10個鐘,咁你就要硬食嗰兩個鐘,亦即係「食鐘」。

所以,就算你一日做十幾個鐘,都可以因為食鐘食到癲佐而唔夠鐘篤。當你發現有可能會無鐘篤,就要快啲同senior/manager講:因為一個星期篤唔夠40個鐘,除佐實俾人抦外,仲會影響你既年度評核。

不過,我從來都無唔夠鐘篤既煩惱,反而係煩點樣可以篤晒啲鐘。

我個部門,我入職嗰年得兩個fresh grad,fresh grad最抵用 — 唔同級數既staff個time cost唔同,同一個budget,fresh grad可以有8個鐘,第二年就得返6個鐘,如此類推。另一個fresh grad仲要一個月之後走佐,於是得返我一個廉價勞工,長期爆鐘,即係喺個booking system裹面一星期超過40個鐘。開頭爆鐘係唔會一次過篤晒,因為一來可以留返唔夠鐘篤既時候篤返,二來公司其實唔鐘意補水,篤OT有錢所以唔鼓勵。

但係我好快已經可以篤OT,因為我計過咁樣儲落去我篤到啲客既audit report出埋都篤唔晒啲鐘。開頭都只係篤十幾二十個鐘OT,但係去到peak season,我已經係一個星期篤緊差唔多一百個鐘。聽啲senior講,部門既partner(老細)有口頭叫過啲senior manager/manger唔可以咁book法,但係又由於我係唯一一個junior staff主修計算機工程,有啲項目又一定要我做,所以無乜人理。

而我雖然係篤緊OT,但係我同時係食緊鐘既,所以我嗰排人生只有返工。計返實際開工時間,人工仲低過做7仔。

去到一月,只係正式返佐三個月工,亦係人見人怕既super peak season,見到自己一月俾人book佐500個鐘,即係一個星期可以篤超過120個鐘,想喊。

頭兩個星期,日日都去一至三個唔同既客,試過朝早喺沙田下畫觀塘炮台山,夜晚返尖沙咀office做work paper(你當寫report啦),我屋企仲要喺屯門,真係行屍走肉咁。依家稔返我無過勞死都算係奇蹟。

chur佐半個月,同時仲有manager/senior繼續book我,我見到啲嘢根本唔食唔瞓都做唔晒。chur到第三個星期五晚,我喺department狂寫狂印work paper,然後望住嗰幾楝work paper,稔起要逐張用紅色鉛筆cross reference(即係寫work paper入邊既證據喺邊度),sign off(既係簽名+寫日期),打橫既work paper仲要逐張摺返做打直既闊度,之後釘窿,有啲緊要既report 仲要貼水泡⋯⋯

auditor既朋友一號 — 紅鉛筆
auditor既朋友二號 — 重型釘窿機

我真的哭了,滴下的眼淚已停不住了⋯⋯

到我做完晒嘢,交埋份篤佐132個鐘既timesheet(即係OT 92小時),離開公司,先發現已經係星期日下晝,先發現自己喺office三日兩夜無離開過。

後記:132個鐘既timesheet後,partner email 俾全部manager/senior manger,叫佢哋唔可以咁樣。於是有個manger話我唔儲埋啲鐘之後篤鐘,我俾佢睇我啲outstanding既鐘,問佢我可以點樣之後篤。佢無聲出。

思然 oce

PhD | Research Psychologist | Psychometrician | Computer Science Teacher | IT Auditor/Consultant | ex-CISA/CISSP | Top Writer in Humor | Work in HK, UK, USA