移居英國雜記(8)/紐約回憶:Craigslist 租房歷險記

思然 oce
Jan 2, 2022

續上回:移居英國雜記(7): 去警局打指模記

黎佐英國一個半月,之前因為未搵到工,而倫敦又好大,交通費仲好貴,所以未有工好難決定住邊區,所以就住住喺妹妹屋企。

依家搵到工,咁就要稔住既問題。

上一次要認真考慮住既問題,就係公司派我去紐約工作一年半既時候。

嗰時,公司第一個月提供service apartment,然後就要自己搵地方住。所以,我去到紐約第一個月,除佐返工,當務之急就係要找屋。喺一個新地方要搵未來一年五個月要住既地方,其實都好大壓力。

我公司個辦公室就喺紐約Manhattan既Times square時代廣場,亦就係大家睇跨年倒數會見到嗰個廣場。(我同以前同事去戲院睇戲,唔記得係乜戲,但有一吓影時代廣場,見到公司個招牌,我哋兩個同時爆笑,我估附近既人應該唔知我哋無端端笑乜。)

Manhattan租好貴,接近我當時既收入三分一。因為我一個人住,覺得租一個apartment好唔抵,我啲紐約朋友說可以去Craigslist搵分租房間,不過就要小心啲,因為都幾多係搵笨既。同埋,Craigslist有好多房寫明「女生免費」,好明顯就係要「另類」服務。

我開頭主要喺搵Manhattan既屋,約佐兩間睇。

第一間超便宜,位置超方便,就喺時代廣場附近,同兩個嚟自中國既女仔分租。於是有日放工就去睇房。

㩒鐘,開門嗰個女仔都幾nice,雖然我講普通話講到一舊舊……佢帶我入屋參觀。一入屋,就覺得房間濕氣好重,有啲發霉味,入面晾住好多衫;因為間屋俾其他高樓包圍住,完全無陽光,佢哋又唔開燈,成間屋都有種死氣沉沉既感覺;厨房睇黎都叫乾淨,但隱約聞到麻辣火煱味。

洗手間我未到門口已經聞到臭味,我連行入去既勇氣都無,求其搵個理由就閃佐。

於是,第二間我就搵距離時代廣場遠啲既屋,因為我覺得陽光可以照入屋好緊要。呢次間屋係同兩個美國女仔分租既。

帶我參觀既女生睇黎都OK,同之前嗰間比,呢間屋衛生好好,她話間屋本身得兩間房,她同另外嗰個女仔已經搬佐入房,所以我間房就係加佐間板既客廳。租金我哋三個人平分。

我本身對加板間既「房間」有啲不安,因為保安應該無咁好。房都仲可以上鎖,但係加間板既「房間」只係用單車鎖,睇黎求其搵個鐵剪就剪得開,而且隔音都麻麻……不過,因為當時只係剩返一個星期,我就要搬離service apartment,而且地點都算方便,我稔,都係住一年多啲啫,於是話可以租。

於是,女生帶我去管理處簽約,唔睇合約由自可,一睇合約就把幾火,我問:「你唔係話三人平分租金架咩,點解我俾差唔多五分二?

女生可能無稔過我會睇合約,話:「係租房既部分平分,不過你要負責加裝間板既錢,係管理處收既,因為係你用架嘛啲間板,好合理好公平啊(This is reasonable and fair)。

我心稔,痴線架?邊有得咁計架,住廳比住房差好多,私穩度少,又嘈好多,譬於佢哋半夜出黎去厠所啊,又或者去夜街返黎都有機會嘈醒我,我本身覺得就算平分都唔公平,有乜理由我仲要交多啲租?你只係將一個本身大家用既地方間出黎分租,無間板根本就唔會變成三間房。她係真心覺得咁樣係合理定係覺得我好呃?

我㩒住把心,冷笑:「合理?咁我住房,你住廳好唔好?

我咁講得,就其實已經豁佐出去,打算唔租——就算她肯俾我住房,我都唔想同存心呃我既人一齊住。

女生呆佐:「但係我已經住喺房,同埋之前住你依家睇嗰間房個女生都係負責加裝間板既錢,佢都無問題啊。

(你哋之前條水魚無問題係佢既事,關我鬼事啊?)

我追問:「咁佢都俾佐錢,點解我仲要每個月俾?間板唔係間佐就得架咩?

女生黑臉:「算,你唔租係你損失,我呢個房好多人想租……

我:「係啊,咁祝你快啲找到個好呃既人啊。

(後來我先知其實管理處因為住多一個人會收多啲租,因為嗰間房本身只係住兩個人。佢哋所謂既「間板」錢,其實根本就係因為多一個人而收多少少既租金,而呢份多一個人收少少既錢,係少過總數既三份之一。嗰個女仔都呃得幾狼死下。)

睇住剩返既時間唔多,加上我喺香港都係住大西北,喺係偏遠地區,所以住遠啲都無所謂,咁我就連Queens啲屋都搵黎睇。嗰邊啲租便宜好多。喺要搬離service apartment前四天,我一口氣約間佐兩間屋。

--

--

思然 oce

PhD | Research Psychologist | Psychometrician | Computer Science Teacher | IT Auditor/Consultant | ex-CISA/CISSP | Top Writer in Humor | Work in HK, UK, USA