前日香港眾志有條片【🤓00後大測試！經典電影識條鐵🎬】，開頭俾啲電影相00後睇，之後就俾佐上面幅六四坦克人相佢哋睇。我啱啱先睇到條片 — 條片cut到一眾00後全部都唔知乜嘢事，睇到我好嬲 — 唔係嬲00後，係嬲眾志。（嬲到我明明稔住去瞓都打佐呢篇嘢。）
眾志好似好多人都係90後，只係大00後少少，無理由咁快忘記中學雞生活係點。為佐「喚醒」大眾，擺班00後中學生上枱，有冇稔過班中學生可能會俾人笑一世？佢哋可能從來都無聽過六四，咁唔通無聽過就係佢哋既錯？我義補緊既00後中學生，完全無聽過六四，但係唔通問題喺佢度？
唔好話依家既00後，我80後，六四時我初小，算親身經歷，但係唔知係記性差定學校無特別講定細佬就嚟出世，所以我好似無睇過六四既新聞，對六四無乜印象，唯一記得就血染的風采。（琴日寫開SARS話好似去佐平行時空，六四我都係去佐平行時空，尤其當年資訊無咁發達，要「平行時空」好易。）
之後，我成個中學時代都無參與過任何有關六四記念既事，對六四既認識亦唔多，如果當年有人訪問我，我都唔知會答佐乜嘢。六四係我入佐大學，開始對歷史有興趣先開始認識，先開始去悼念。如果其他人唔知道六四，你就上網「討伐」，咁只會令唔了解六四既人更討厭悼念六四既人，要知道依家已經好多人想淡忘六四，或者令悼念六四成件事變質。
而且，我心底裹厭惡眾志將六四呢件咁傷感既事同啲「經典電影」放埋一齊，可能我無乜幽默感，但係六四真係唔應該用嚟講笑。希望眾志唔好再做啲咁無腦既嘢，段片啲留言已經係欺淩緊嗰幾個中學生，雖然delete條片都無用，damage is done，但都希望佢哋會delete條片，起碼班中學生無咁易見到啲留言。（好似話依家啲中學生唔多用facebook，希望佢哋啲同學睇唔到段片，同佢哋睇唔到啲惡毒既留言。）
無論如何，我會繼續悼念六四，亦會用我既方法令下一代嘗試了解呢一段歷史。
