史兄最近講好多人「已經退出咗 Medium轉咗場」，講自己唔轉場既考慮。我無佢失義失德既煩惱，因為無人係因為我而黎呢度既。不過，我唔轉既原因好簡單：我只係想寫文俾唔識既人睇，但係又唔想全世界都睇到，呢度人少少其實好啱我…… :P
印象中，我一向都鐘意作文。雖然由細到大，無論中文作文定英文作文，啲分數好飄忽——有時好高分，有時又好低分。但係我不嬲都唔太介意啲分數，所以從來無因為想攞高分而去改變我作文既風格或者方法。唔記得自己鐘唔鐘意作文堂，不過好肯定好憎謄文。
咁我覺得自己啲文好唔好呢？
好老實，真係好麻麻，啲文筆唔流暢，有時仲寫到亂七八糟，錯別字又多，成日稔到乜就寫乜，有睇開我寫文既朋友應該估到我寫嘢時係完全無計劃。
話說最近研究緊中小學生既中文寫作課程，於是要了解學校一般係點教作文，同作文既評分準則。唔了解由自可，一了解先知我應該中小學既作文堂都係夢遊緊。
首先，課程係要教學生起寫作大綱。譬如寫記敍文，個寫作大綱就通常會包括「起初，經過，結果，感想」。
而我一直以為寫低「起初，經過，結果，感想」呢八隻字就係起佐個寫作大綱。我見到啲教材，先知原來要寫埋嗰啲「起初，經過，結果，感想」出黎，即係「起初：我去旅行；經過：落大雨，成身濕晒；結果：提早走，好唔開心；感想：去旅行先黎落雨，唔通連個天都唔鐘意我」之類。
然後，我醒起，中學作文大綱好似會計分。唔知點解，我都係Get唔到要作文之前要寫佐大網嗰頁先——我不嬲係寫完篇文先填返個大綱，我仲以為係要寫返自己篇文既總結咁無聊咋。
唔知大家依家寫文會唔會起大綱？我可能因為由細都大都無起大綱既習慣，所以呢度所有文我都無起大綱。
因為自覺啲文難登大雅之堂，我寫文只係純粹想記低自己做過啲乜，又或者幫助梳理一下想法。我稔我鐘意寫嘢有部份係因為我記性真係好差，我唔寫低真係唔會記得。
我好多時寫既嘢都同生活有關，所以唔想俾一啲識既人睇到。呢度知我真身既人一隻手數得晒。加上我十年前喺Facebook寫過一篇短文俾幾千人share，引到一啲煩人不斷炸inbox，見過鬼好怕黑，所以唔敢再將啲文俾全世界任睇 ，呢個亦都係我將呢度所有文都係設定做members only既主因。
唔開Patron，一來我唔覺得自己啲文值得有人俾錢訂閱，二來，如果我將寫文同搵錢掛鉤，我應該會好大壓力，一定會執勁耐先出文，之後就會唔想再寫。所以，我應該都會繼續喺呢度好一段時間既……
