黑仔既我，申請BNO-visa真係一波三折。照肺俾某X健集團拖佐接近一個月，搞到九月尾先交申請，嗰時審批時間係大約三星期。我身邊有幾個朋友都係三星期內搞掂。
十月頭，連登入面有啲人開始話兩星期就得。
上星期，睇到有啲人話自己十月頭申請，已經批佐。
於是我就開始擔心，到底係我既申請有問題定點呢？但係又完全收唔到任何通知話要補資料喎。
唔，或者係連登有啲人係吹水，可能亂咁講啫……
然後，我有朋友遲過我申請，批佐。
因為有一欄係填打算幾時到英國，我就稔，會唔會係因為我太老實填十一月一日，所以佢稔住臨月尾先批俾我？於是我問朋友佢填預計到達係幾時，佢話佢填佐一年後……
點解會咁架！？
我唔明佢哋處理申請既次序到底係乜。唔係First in first out，又唔係睇到達日期。我仲要上年先申請佐BNO，今次淨係要補好少資料，連副簽都唔駛，應該係最易批嗰一種，到底係乜嘢令佢哋要搞咁耐？
應該就係因為我黑仔，黑仔跌入BNO-visa黑洞，so appropriate…. （黑洞係連登用黎形容等visa無消息既情況）
我依家已經等佐三星期有多，因為我趕住換機票（Asiamiles就到期），同埋未有visa乜都做唔到：我搵既工全部都唔幫你搞visa，所以越等就越擔心。最慘係完全無辦法跟進佢哋個進度，真係淨係可以等運到。然後同親朋友食飯，佢哋一定會問幾次飛，我都好想知幾時可以飛啊……
明知擔心黎都無用，但係就係因為做乜都無用，所以先擔心。
咁唯有寫下嘢分下心啦，同等有啲好似我咁跌佐入黑洞既朋友仔見到我個情況可以無咁擔心……You are not alone.
