在星巴克和中學生補習，一位伯伯急躁地走過來，無視我的學生，大聲地向著我叫喊。他說的好像是普通話，但我完全聽不懂他說甚麼。
我搖搖頭，示意我不知道他在說甚麼。他卻忽然把一張內地的證件遞向我，一邊指著上面的照片，一邊向著我講一大堆話，我只好用唔啱音既普通話說：「我完全聽不懂，你說慢點可以嗎？」
伯伯續繼超級大聲地向著我叫喊，而且還在手舞足蹈，有點像情緒失控。見到情緒失控的小孩我知道大概可以怎樣處理，但是情緒失控的阿怕我則無從入手。伯伯一臉焦急，我雖然想幫他，不過也有點驚，怕他會打人。
學生有親戚是內地人，每年都回鄉幾遍，我大聲問她：「你聽唔聽得明佢講乜啊？」
學生：「明啊，佢……」我聽不到學生說甚麼。
伯伯忽然一手搶了學生拿著的筆，想在她的功課上寫字。
學生連忙制止，用純正普通話說：「你想我們怎樣幫你？」
伯伯見到學生懂普通話，用更高速的普通話大聲叫喊。我聽起來，他就好像在喝罵我的學生，不過，由於學生會重覆他說的話，我大概明白他和同行的朋友走散了，他又沒有房咭等等……
他在擾攘了數分鐘，明明附近都有頗多顧客，伯伯又不去問其他人……
學生跟我說：「佢話想我哋幫佢廣播搵返啲朋友。」
我：「呢度附近好似都無廣播喎……」
因為伯伯超級大聲兼大動作，我們兩個都不知如何是好。我的學生不斷跟他說我們不知道那裏可以廣播，也不知服務台在那裏。我正想叫學生叫伯伯去問星巴克職員時，有位青年走過來，問他有沒有朋友的電話，伯伯說他只有內地的號碼聯絡不上，後來青年跟他說怎樣去服務台，說了好一回，伯伯才離去。
我問學生：「他係咪講緊普通話啊？」
學生：「係啊，不過好重口音，有啲難聽。佢咁我好驚啊。」
我：「都係啊，一個人真係會驚，下次快啲叫佢搵職員幫手啦。」
學生：「唔係啊，我驚佢其實係想呃我哋啊，又或者會噴啲氣整暈我哋啊。大陸啲親戚係咁講架……」
我：「唔，我稔唔會掛，佢真係好緊張喎，咁會嚇走人多過呃到人掛……同埋佢啲普通話咁難明，要呃人都講啲香港人會聽得明既普通話？香港應該安全啲掛，周圍咁多人……」
學生：「咁又係，不過如果返大陸都係小心啲好。」
我：「係喎，佢做乜猛塞自己張証俾我啊？」
學生大笑：「嗰張証係佢朋友架，佢話佢朋友啲証件全部都喺佢度……一睇就知張証唔係佢架，個樣完全唔同喎……」
補完習後，伯伯離開佐三十分鐘，學生問：「都仲未聽到廣播，唔知伯伯搵到啲朋友未呢？」
我：「係喎，我都唔記得佐添，希望佢搵到啦。」
學生：「可能佢去搵服務台嗰時撞到佢啲朋友啦。」
我唯有希望係咁，而唔係伯伯其實真係想呃人啦。
更希望香港唔會有一日連幫一個傍惶無助既老人家都要小心翼翼……
