談咖啡系列上五篇：談咖啡（一）；談咖啡（二）；談咖啡（三）；【IT9@B4】百年難得一遇既筍job X 談咖啡（四）；談咖啡（五）#10YearChallenge
上回講到大學通識課程，令我走上手沖呢條不歸路。題外話，香港大學既通識課程其實很有趣而且真係學到嘢，所以，雖然我讀研究院唔駛上通識，但係見到啱既我都會晨早去排隊報名讀。當年我除佐讀過咖啡，仲讀過作曲填詞、寫劇評、攝影等。讀港大既朋友其實可以留意下。
雖然呢科「咖啡旅程」得四堂，但係內容非常充實，講唔同產地既咖啡豆有乜唔同，例如非洲啲豆會果酸多啲，南美洲就堅果味重啲。
講起咖啡酸，好多人都以為差既咖啡先會酸，因為好多時喺茶餐廳飲到既酸味咖啡都係好難飲。其實，因為咖啡其係水果——而咖啡豆係咖啡果實既種子，成長過程自然吸收果酸，所以咖啡酸其實係正常既。依家有唔少精品咖啡會形容自己既果味，譬如係士多啤梨，檸檬，柚子，蕃茄等等，我試過有隻話自己有西爪味添既。
既然果酸係咁正常，咁點解大部份人都接受唔到茶餐廳既酸咖啡呢？除佐個人口味因素，其實酸都有分好酸同壞酸，如果用英文，sour 就係唔好既酸，好既係acidity。
酸味既好與壞，就在乎咖啡豆既處理方法與烘焙程度。例如：太早採摘，咖啡果唔夠熟，就可能會太酸；處理過程如果無揀豆，有機會包埋啲變壞過既豆等等。
好既酸味，就隨佐同處理同烘焙方法有關之外，就連沖既方法都有影響。感覺上，壞既酸味係唔太關沖既方法，最多係壞酸加埋少水沖或者唔夠熱既水沖，令壞酸味更明顯…（有錯請指正。）
咖啡果實，個樣有啲似櫻桃，所以又稱為咖啡櫻桃（coffee cherry）。人手摘完咖啡果實之後，要先將咖啡果實入面既種子完整咁拎出黎，再經唔同既烘焙方法，就會成為我哋平時買黎沖咖啡既咖啡豆。
要喺咖啡果實入面拎啲咖啡豆出黎，就要將包住咖啡種子既外果皮、果肉、果膠、內果皮、銀皮整走。咁啲咖啡果咁多咁細，無可能用人手，於是就有唔同既處理方法，最常用既有三種：日曬，蜜處理，水洗。
呢三種方法，首先都係要將啲果實倒入一個大缸，然後揀走晒浮喺水面嗰啲，因為浮面就代表粒果實可能俾蟲蛀，又或者有其他生長問題。（最開始既貓屎咖啡，就靠野生麝香貓去揀靚豆，所以先咁貴。）
之後，沉底嘅咖啡果就用唔同既方法去處理。日曬既話，就要攞去曝曬幾星期。爆晒曬期間，為佐要曬得均勻啲，間中要翻吓啲果實。等到種子外面啲果皮果肉全部硬晒，就可以用機器將的硬殼整走。
水洗就會先用機器整走的果肉果皮，再用發酵菌整走啲果膠，大約要一兩日時間。然後，用水沖洗走啲發酵菌。最後，就要烘返乾啲豆同用機器整走埋內果皮同銀皮。
而蜜處理，又稱半日曬，因為佢其實係日曬同水洗既混合版：就係先用機器整走果肉果皮，然後先拎去曬。最後再用機器整走啲硬佐既果膠殼。
