2007年去紐約，公司有部Flavia，應該係廉價版Nespresso。當年我無見過Nespresso，見到呢部Flavia，覺得好神奇，因為咖啡都有好多種，印象中有Brazil, French Roast, Columbia等。我之前一直都唔知原來咖啡有咁多唔同種類。呢部機連茶都有唔同種類既包裝，不過直接用滾水沖茶包其實仲方便，而且呢部機既茶同咖啡都唔夠濃，所以飲茶我好少飲呢部機既成品。
就算連咖啡，呢部機既成品其實都唔太好飲，三隻唔同既咖啡味道其實差唔多，不過已經好飲過即溶咖啡。而且，當年香港公司根本無咖啡供應，所以見到紐約總部入面呢部機，已經覺得總部對員工好好。
後來去幾間投行做審計，間間都有Nespresso，唔同顏色既capsule，真係飲到唔同既味，而且仲好飲好多！感嘆一山還有一山高。（同時有少少慨嘆當年做乜有機會都唔返投行。）
飲慣Nespresso，開始覺得即沖咖啡唔好飲。同時，唔駛返工既日子，就算出街食飯，快餐店既咖啡好多都只係咖啡味既水。美國麥當勞，同香港相反，飲咖啡係唔駛加錢，反而飲汽水要加錢。有日去Zabar’s（紐約一間大型超巿，有啲似c!tysuper，佢哋好似仲會批發咖啡豆、茶、芝士之類農產品），見到一個攤位放佐幾杯咖啡，上面插住一支好幼既金屬棍，好似咁：
見到幾杯咖啡咁樣排列整齊插晒喺度。我稔，如果有中國老人家，應該會話大吉利是。
我行埋去，推銷員熱情地問我飲唔飲咖啡，我話飲，佢就話：just the right time! 然後用力將支棍襟低，打開個mouthpiece（mouthpiece既中文係乜？搵極都搵唔到）遞俾我。
我飲佐一啖，係我從來都未飲過既味道！我同個推銷員咁講，佢好高興，話呢隻豆佢都好鐘意。然後佢問我飲開乜嘢咖啡豆，聽到我無試過買咖啡豆自己沖咖啡，就教我落下面買包新鮮咖啡豆，叫佢哋幫我磨到啱French press既size，又示範點用French press沖咖啡。
我聽完佢介紹，覺得都幾容易，問佢個French press幾多錢。推銷員指住我飲緊杯咖啡：「你返屋企試下用呢個沖睇下啱唔啱用先啦……」
我：「吓，個杯唔駛俾返你哋架咩？」
推銷員：「唔駛啊，個杯俾埋你架。」
於是，我第一個咖啡玩具就係8oz travel press by Bodum，而第一次買既咖啡豆就係Zabar’s House Blend。
呢個玩具非常好用，但係因為太小，每次得8oz，真係到喉唔到肺。於是過佐一個月，我去Zabar’s稔住買個大啲既French press。去到咖啡工具既section，發現有好多唔同既玩具，而最吸引我既就係aeropress（愛壓樂，當年香港台灣應該未出現呢舊嘢，我估香港人嚟講我算走在時代尖端 :P）。French press最煩就係要洗，同埋要等幾分鐘先得；而aeropress啱啱相反，唔駛點洗，而且跟返說明書做法，一分鐘就沖壓到一杯濃度似espresso既咖啡。加上價錢合理，USD20，於是買返屋企試下。
試完aeropress真係返唔到轉頭，因為真係又快又方便，而且唔會好似French press咁有咖啡渣，口感乾淨。最重要係因為加水之後攪十秒，然後壓二十秒就搞掂，好少會好似French press咁浸太耐搞到過度萃取有難飲既雜味（雖然其實係我衰成日都唔記得留意時間）。
aeropress雖然好方便，但係用豆量驚人：出黎既話就話似espresso，但係點都有段隔離，所以要靠多豆搭夠。為佐要出三份espresso溝奶扮latte，要用成36g既豆！（近呢幾年，aeropress多佐好多唔同玩法，例如invented…
