早排，我同老友訴苦，我家兩老成日話「該死唔駛病」唔肯戴口罩，叫得掂佢哋戴又成日重用又摸眼摸鼻，仲辛苦過喺幼稚園教仔。
頭先，呢位素來冷靜斯文的老友氣急敗壞打電話來：「救命啊，我阿媽仲大鑊過你阿爸阿媽啊，佢信蒸口罩真係得架，叫我攞返啲細路用既口罩俾佢蒸。我講乜佢都唔信啊，我驚佢我唔睇住真係俾呢啲蒸口罩我個仔用啊。你話晒都係doctor你幫我同佢講下啦。」
我滴汗：「呃我係博士喎……你阿媽好似都知我心理學架，有乜用啊？」（其實係哲學博士，不過費事啲人以為我真係讀哲學所以都係話自己讀心理學算數）
老友的媽媽是深藍絲，會去何已完撐警大會，仲成日like埋啲深藍假文。佢哋已經冷戰佐好耐。
老友：「佢鬼記得咩，同埋就算記得你點都係博士吖，講一句可能好過我講十句，或者你幫我send啲片俾佢啦。」
我：「你不如搵張醫生啦，佢喺屯門醫院做，佢講一句好過我講一百句喎。吖不過佢打緊仗都係唔好煩佢好啲……」
老友：「咪係囉，你係我唯一搵到既doctor啦！」
我：「但係蔣麗芸好似都係 doctor喎……」
同一時間，我聽到老友嗰邊有人講嘢，我老友叫我等陣。
過佐一陣，佢把聲輕鬆晒，話：「好彩搞掂啦，東張西望唔知點講啦，總之啱啱澄清佐唔可以蒸口罩，我阿媽又信到十足十，估唔到東張西望都有佢存在既價值。」
到底有一個信「該死唔駛病唔駛戴口罩」既家人慘啲，定有一個信「蒸口罩」既家人慘啲？
不過，我相信兩個都有應該係最慘。
繼中救救 マスク伏後，依家又中「蒸口罩」伏，大家又係時候睇下兩老有冇俾衞生事務委員會主席蔣博士老點了。
