聽日（二月一日）係英國十年以嚟最大規模既罷工日，唔單止成日罷工既巴士火車司機會罷工，仲有大約十萬個中小學教師，七萬個大學教職員，同埋大學政府、駕駛考試中心、博物館、港口和機場等 123 個部門約十萬位公務員等等。
我間學校一百一十四個老師，聽日應該得十個老師會返工，仲要全部都係高層（SLT — senior leadership team）：即係校長，四個副校長同五個助埋校長。
我都要返工，但我當然唔係高層啦，我只係太低層。我係學習支援助理（LSA — learning support assistant），即係support staff。support staff工會投票唔夠數，所以如果我加入罷工，唔單止無工會補貼返少少人工之外，仲有機會會有紀律處分。
罷工係無糧出既，工會會補返少少人工。
我一直以為工會係會補足，但最近聽啲老師傾，係似乎補唔足。但係詳細會補返幾多我就唔知。我聽到有啲老師話「交咁多會費就係為佐真係需要罷工既時候可以罷工，如果啲人為佐攞返足份人工而唔罷工既話，咁就無必要入工會啦」。雖然佢係講笑既語調，但係英國人成日都講笑咁，我都唔知佢哋幾時係講真幾時係講笑。
校長話因為佢明白點解要罷工，同埋佢都認為真係要加人工，所以就算無入工會既同事想罷工，佢儘量都唔會紀律處分。但係最奇怪係，因為呢邊有幾個老師工會，如果你唔係今次搞罷工嗰個工會既會員，而係其他工會既會員，返而你係一定要返工唔可以罷工同會有紀律處分。
Support staff工會投票唔夠數真係好奇怪，學個老師話齋「交咁多會費就係為佐真係需要罷工既時候可以罷工」，入工會基本上係零福利，唔同教協咁有超巿有電器賣，真係得法律支援同讀課程有折扣架咋。入得工會但係咁大件事都唔投票，真心Ｒ頭。
校長雖然話support staff罷工佢都應該唔會執行紀律處分，但係，我同其他learning support assistant傾，無人會罷工，始終我哋人工真係太低搵少一日就係搵少一日，大部份人都唔夠錢洗。雖然我又未去到連開暖爐都唔敢開既地步，但係我係成個部門最低年資嗰個（因為人工太低一直都請唔到人），所以我更加無理由罷工。
植入廣告：https://ko-fi.com/ceoce 大家如果可以，請支持一下。呢度（無論係Medium定LSA）收入真係太低……我喺 “Enjoy the read? Reward the writer.”link佐兩個月都無人去過 😢……
