港鐵話公眾假期所以要遲交report，仲離譜過啲大學生。
識得成功講大話呃到人，其實係小朋友既認知發展里程碑：因為講大話係需要估你想呃嘅人會點稔，再稔下點樣講先可以呃到佢，唔會穿煲。同理，識得稔一個好啲既藉口說服人俾你遲交功課，都一樣要稔下你要說服既人會點稔，再度身訂造一個說服到佢既藉口。
不過，港鐵又駛乜理說唔說服到你呢？反正佢連公眾假期唔交功課呢啲白痴藉口都講得出，擺到明知道連政府都吹佢唔帳。
但係，大學生，你哋應該未到港鐵既Level ，唔該講大話／搵藉口時用下個腦，考慮下我哋嘅感受。
無錯，一到交功課或者考final時間，一眾tutor同lecturer都要經歷一段勞氣既日子：就係成日俾學生當我哋係低B白痴。為佐R多少少時做功課，啲學生真係無所不用其極。
拖功課最常用有兩個方法，一係搵藉口遲交，一係扮交錯之後扮發現。
最常用藉口：病
病，口講無憑，我哋要醫生紙。其實要醫生紙唔難，大學睇醫生仲唔駛錢。但係，一年硬係會收到幾張假醫生紙，假既程度係肉眼睇已經睇得出：有學生張醫生紙皺晒，但係就咁係上面改個日期，然後得個日期係無皺；仲有學生搞膽死用改錯帶蓋過個日期之後寫過另一個日期，支筆仲要唔同色，真係當我哋老花兼色弱？
同埋，我哋會隨機抽幾張打電話去診所check堅定流，無論Photoshop技巧幾高超都好，都有機會穿煲。假醫生紙其實係偽造文書及使用虚假文書，報警真係監都有得佢哋坐。所以開學我哋都會講千祈唔好交假醫生紙，但係每年都硬係會收到啲假醫生紙。
好彩都有啲學生知道唔可以交假醫生紙，所以會用其他方法提供證據。試過有學生話發緊高燒要遲交功課，叫同事睇附件。同事以為附件係醫生紙⋯⋯
點知，附件係一張相：
一張影住個溫度計既相。真係唔知好嬲定好笑。
第二常用藉口：死
外國有講師在twitter分享：「只要將必修課由上午九時改為下午二時，學生祖母的死亡率就會大幅下降。」
我相信如果功課無deadline，也會有同樣效果。
