小朋友玩得好嘈。老師：「你哋再咁嘈，我就取消你哋玩嘅資格！」
小男孩甲問小男孩乙：「資格？乜嘢係資格？」
小男孩乙：「呢啲指甲啊！」（指住自己隻手指甲）
小男孩甲：「燒佐你啲指甲！」
由於做研究要喺幼稚園不停講故事，所以喺幼稚園度每日可以飲兩公升水。因為第一日我淨係帶佐一樽水，又無時間去教員室打水，所以去阿信屋買佐一排六支750ml有氣水。
之後每日都用呢啲空樽裝水回校，講故事口渴就會飲水。間中有小朋友問我飲乜嘢，我都話「水囉。」
今日，有個小朋友問：「謝老師，你做乜成日飲酒啊？」
（我終於知道點解有時我飲水啲小朋友會喺度奸笑啦。死啦，佢哋唔會返屋企話俾家長聽有個老師講故事猛飲酒掛⋯⋯）
茶點食糭，老師分配時見到有肥豬肉，一邊夾走一邊說：「呢個都係唔俾你地食嘞。」
小男孩：「點解啊？」
老師：「呢個肥豬肉係調味用㗎，無益，所以唔好食…」
另一個小男孩興奮：「我想食肥豬條尾啊！」
老師拎著本書「Hot!!!」，指著書名叫小朋友讀。
全班小朋友：h — o — t 之後靜下，得返一個小朋友自己繼續：i — i — i …
茶點時間食蛋白蛋撻。
小朋友：「嘩！真係超級好食啊！」
我（明知故問）：「吖，點解啲蛋白色嘅？」
小朋友甲：「熟佐吖嘛，熟佐咪白色囉！」
我：「唔係喎，雞蛋熟佐應該係黃色㗎喎⋯」
小朋友乙：「熟到甩色吖嘛⋯」
問小朋友想要邊個貼紙，佢話：「唐老鴨女人！」
雀巢公司送佐一批小冊子俾幼稚園教小朋友健康生活。
老師：「雀巢送佐啲書俾你哋啊！」
小朋友興奮地同隔離位講：「嘩！！雀仔送野俾我哋啊！」（雙手上下拍，扮飛）
音樂室其中一幅牆係塊鏡。
老師：「我哋一齊望住塊鏡……見到啲咩啊？」
小朋友：「塊鏡！」
老師問：「我哋平時點樣可以見到自己個樣啊？」
小朋友全部都九唔搭八……
老師再問：「嗱，咁如果你塊面污糟佐，你要望咩嘢先知道啊？」
某小朋友大叫：「媽咪！」
