返佐呢份工一年，扮發火就試過好多次，因為我哋有啲仔係你唔發火佢一係唔理你，一係就當你係朋友以為你「講笑」，又話者明明好認真上緊堂佢都要喺度講笑玩嘢。例如我有個仔，數學堂話Find x，佢圈住個x，話我搵到嘞，而佢個樣勁cheeky，擺明就係玩嘢……
我嗰下既真實反應係滴汗，心稔「呢個MEME已經唔再興啦好無……」，唯有好笑位係佢仲覺得好搞笑。但係我唔可以滴汗同笑，我係要扮發火，叫佢唔好玩嘢，快啲認真做嘢，唔係呢個仔一定會同我拗條題目明明話Find x，而我又無時間同佢磨，所以真係要扮發火。
但係喺放half term長假之前既一日，我第一次發真火。我發現我發真火其實同扮發火係好唔同。扮發火我個樣都惡同語氣都會惡，但係發真火，我只會無表情同用好冷漠既語調鬧人。
搞到我動真氣既學生Ｄ其實唔係我負責既仔，我係主要幫佢個班一個過度活躍症既中四男仔，佢坐呢個男仔後面。不過Ｄ有時跟唔到我都會幫下手，所以佢都會問下我問題，我哋既關係都算唔錯。
關係唔錯其實係緊要，我本身唔會鬧唔識既學生，你稔下，一個三九唔識七既人鬧你，你停止做一樣嘢只係因為嗰個人大權過你，我好唔鐘意用權力去鬧人，同埋咁樣好難搞返好啲關係。當然，咁亦都係可能我未遇到一個情況我係需要鬧一個唔識既學生啦。
講呢單嘢之前，要講少少背景資料。我學校每次放長假前最後一日既最後一堂既最後十分鐘都會直播校長講話：通常都係講下放假之後學校有乜計劃（例如轉季／轉時間表／課外活動等），之後就會頒發最佳學生奬。
最佳學生由零至兩位不等。如果無合適學生，咁就會「從缺」，不過通常都會有一個既。兩個既話，就通常中一至中三／中四至中五／中六至中七其中兩個組別都各有一個。
學校對於呢個最佳學生奬既要求都幾嚴格，要出席率高，努力學習（唔一定要成績好，但係要有盡力），對老師同學有禮貌，樂於助人等。因為最佳學生奬係一條特別既校呔，所以，你見到戴住嗰條校呔既就係攞過最佳學生，幾威。
老師臨學期完都會好頭痛稔提名邊個係最佳學生，理論上你一年要提名六次，而你提名過又唔可以再提名，但係要求咁高，其實真係好難搵到六個唔同既學生。同埋好多時你覺得係最佳學生既通常都已經攞佐最佳學生，而攞過既學生就唔會再攞，所以真係好頭痛。最搞笑係，我哋既preformance review其中一項就係要提名最佳學生，所以唔提名又唔得。
所以，獲得最佳學生既學生真係要好努力好俾心機先會攞到呢個奬，絶對唔係豬肉奬嚟。不過，因為好難拎，所以亦都唔係好多學生會以攞呢個奬做目標。
一個咁難拎既奬，頒奬既方法就梗係要有返咁grand先得：去到學期完結既「校長講話」，到校長講晒啲話之後，就會交個波俾一個揸住攝錄機影住副校長既老師，追住副校長，副校長就會奔跑到最佳學生個課室頒奬。成件事好有記者跑新聞既感覺。副校長係體育科老師，跑得好鬼快，所以追佢個老師啲喘氣聲都會收晒，睇既時候真係會緊張。
頒呢個奬既時候，我就喺中四課室，上緊數學堂。我同個數學老師都算幾熟，因為我係幫佢一班中一同一班中四，所以日日都起碼見一堂。數學老師搞唔掂個播音系統，所以佢只可以用手提電腦個喇叭直播呢場「盛事」。我哋學校既弱雞Dell手提電腦喇叭超級細聲，於是我就開埋我個手提電腦，好似立體聲咁左右放等都大聲返少少，但係都係好細聲。稔返轉頭，如果係用緊播音系統，因為啲細佬見到副校長入自己課室，即係代表自己有同學攞奬，都會好興奮尖叫，而我就唔會聽到一啲令我發火既comment。
喺副校長奔跑緊去得奬學生既班房，校長讀佐一段老師提名既內容，我就知得奬既係一個中二有特殊學習需要既女仔——因為佢係我學生，我睇到佢所有提名既內容。咁作為佢既老師，佢攞奬我都開心。不過我其實覺得佢嗰班有另一個女仔更加應該得到呢個奬，所以我有少少失望。（詳細原因同呢次發火無關係，所以就唔講。）
校長讀呢個學生個名時，喺我後面既學生Ｄ大叫呢個女仔既花名，而因為Dell手提電腦弱雞喇叭，所以全部人都聽得好清楚，其他學生都喺度開始笑或者想加入一齊笑。
我知呢個女仔因為呢個花名唔開心佐好耐，有次同我傾傾下仲爆喊，我要寫safeguarding報告——英國好緊張bullying，我哋有乜懷疑都要入safeguarding系統之後有同事跟進。
我估唔一個中二學生既花名連中四既學生都知道。同埋聽到Ｄ咁離譜，我用好嚴厲既語氣同佢講：「this is name-calling, that’s a B2」
B2即係扣兩分操行分同留堂一個鐘。
