有日上完堂，祈老師（幫佢改返個中文名先）問我第二日放學之後有冇時間幫手帶學生去睇劇。
我同祈老師都算熟，佢喺一個好有心既老師。反正平日放工之後我其實無嘢做，稔住都係放學之後去附近既中心睇下啲友校演出既戲劇，唔知頭唔知路既我就話ＯＫ。
第二日朝早，祈老師話五點半喺學校正門集合，傾多幾句，我先知完來我哋係去睇專業製作，咁就弊啦。
免費睇專業製作咁著數有乜弊？
專業製作，即係夜晚八點先喺West End啲劇院開始，咁十點幾十一點先會返學校解散，等啲家長接晒啲仔，返到屋企分分鐘十二點幾，如果係星期五晚都話吖，但係今日係星期四，第二朝我哋仲要一早返學。
所以，雖然學校飛通常都係一啲靚位，但係都好難搵老師帶團。加上我學校附近治安非常差：每年起碼兩個老師俾人搶電話手袋，早排仲有學生俾人用刀指嚇見埋報。
我以為星期五晚無學校飛，因為多人星期五晚睇，祈老師話唔係，星期五晚好多老師都會去酒吧更加難搵人幫手帶隊，所以通常都係揀星期四。
我第一套帶學生睇既劇係the woman in black，呢套劇因為唔出名，二十人報名最後得八個學生出現。祈老師仲要好勞氣咁打電話去通知家長，確定個仔真係喺屋企，因為驚有啲仔扮黎其實係走佐去出夜街。
然後，出現既八個學生，入面有一個跟本無報名，老師又要打電話俾佢家長，問家長係咪真係同意，同埋又要叫校務處電郵封同意書俾家長即係簽返（係，校務處明明四點半放學五點幾都仲有人做嘢既）。仲有，好多仔都唔準時，然後有啲準時既仔又唔耐煩走佐去幾條街外既雪榚店買雪榚食，結果五點半集合六點三先出發。
就黎出發既時候，有個老師啱啱放工（我唔識佢既），路過指住我，同學生講：you guys should thank miss, if she doesn’t volunteer to help we would have to cancel this trip cause we don’t have enough teachers! 然後就閃走。
之後幾個學生真係走過黎好認真咁同我講多謝。
呢邊係唔興搭校巴既，出親school trip都係搭公共交通工具。今次因為係兩個老師八個學生，所以我哋每人睇四個，都叫做無乜大問題，七點未到已經去到Convent Garden。我之後試過三個人帶四十個學生，真係災難，有機會再講。
班學生去到Convent Garden，勁開心，猛自拍同tiktok，佢哋原來好少去Convent Garden，見到啲名店又衝入去睇，因為學生人數少，我哋叫做處理到，加上八點先開始，有大把時間，帶隊老師就話由佢哋開心下。呢班係GCSE學生，過兩個星期就開始考試，可以輕鬆下都幾好。
（後來放榜，最乖嗰個學生喺敝校成績最好既學生。）
入場之後，學生勁興奮走去買思樂冰(ICEE)同爆谷。呢度啲思樂冰既顏色真係好恐佈，我唔敢試。學生好多都係帶住一大堆零食當晚餐……成班學生好開心咁分享自己既晚餐。
有個阿伯，坐我哋後面依依哦哦話做乜咁多細路咁嘈（呢晚有起碼三間學校），我同祈老師同佢講唔好意思，開始之後應該會好啲。
我忽然醒起，食晏時有個老師聽到我帶隊去睇黑女人，佢話佢舊年帶嗰班仔成日乘機尖叫，套劇係有嚇人位，但係佢哋既尖叫係不成比例既大聲，擺明係玩嘢，激到佢死所以發誓唔會再帶啲仔去睇黑女人，佢提我叫班仔要乖啲。弊嘞，唔記得佐添。
我同祈老師一人坐一邊，中間坐晒八個學生。我哋本身預佐有二十個學生，所以前面成排都係吉，我哋問依依哦哦阿伯想唔想坐前啲，阿伯好高興咁坐佐前一行。
套劇非常麻麻，我最憎睇嚇人片係嚇大聲同失聲無神尖叫，呢套就係咁，不停係用強光特效嚇你。坐我隔離個女人（非學生）仲要次次都大叫同打到我。班仔好彩生性開始佐真係無嘈亦都無乘機大叫，我有少少懷疑我隔離個女人係乘機大叫同打我多啲。我本身無比效果嚇親但係成日俾佢嚇親。
個故事啲橋其實唔錯，不過就係一個十分鐘可以講完既故事講佐個半鐘，真係好悶。成套劇得兩個演員見到樣，佢哋真係演得好好，先叫救到個演出，唔係真係悶死。
劇終，我哋一齊行去拾地鐵，再經過Convent Garden啲名店，夜晚啲名店既燈飾好靚，班仔又一次好興奮咁影相同拍片。見到佢哋可以放鬆，祈老師一邊望錶一邊話：「由佢哋周圍影相啦。」
當年中五，我無乜印象學校有冇outing俾我哋放鬆，但係我估，如果我有機會同班同學去銅鑼灣睇劇，我應該都會咁興奮，套劇雖然麻麻，但係對呢班學生黎講，可以一班人一齊狂買狂食零食，對爆谷思樂冰同夜媽媽仲喺convey garden先係個trip 既highlight。我估佢哋十幾年後未必記得套劇，但應該會記得同班朋友好興奮咁喺名店前面拍片。
搭車返學，問學生套劇好唔好睇，一致話好悶。咁問佢哋有無後悔黎，佢哋一致話無，因為無乜機會出夜街同搭地鐵，好開心。祈老師話我住得遠，叫我唔好出站跟返學校，直接搭地鐵返屋企佢話佢會搞掂，我話會唔會危險，佢話佢慣佐無問題。佢基本上係唔俾我落車。
不過，就算我唔跟返學校，嗰晚都變佐我去度英國最夜未返屋企既一晩，但係見到班仔咁開心，搭車時又同班仔吹佐好耐水，了解佐佢哋多啲，都值得既。只係最辛苦喺瞓佐唔夠四個鐘又要返工嘞。
