上一篇：摸黑去見工
15 Dec 2021 09:30 London Time (17:30 HKT)
在磨咖啡豆時，電話忽然響了起來。我連忙衝入房接聽電話。
因為現在我只有兩種情況會收到電話：有關求職的，和欺騙電話。（對，英國和香港一樣，也是有很多電話騙徒。）
是上星期五摸黑去見工的學校打電話來，人事部的同事的語氣很低沉說：「我是ＸＸ學校的ＸＸ啊，早晨，how are you doing?」
寒暄兩句，我想他應該是想通知我不成功了。然後聽到他說your application is successful.
一個月前這個時間，即15 Nov 2021 17:30 HKT，我是還在香港準備前往機場啊。
找工真的剛剛找了一個月！
然後他就電郵了一堆文件讓我填寫，及約時間去學校交文件正本做enhanced DBS Check.
所有重要文件記得帶正本
好彩我有個移民佐去日本既朋友提我要帶文件正本去英國啊！因為我其實大學畢業只係搵過一次工（big 4），然後我喺返讀嗰間大學度做嘢，接近二十年無試過要正本，一直以為乜都scan晒就得。如果唔係佢提我，依家要等香港寄過黎真係有排等。同埋科大個張証書仲要鬼咁大張，要寄都應該好煩。
另外，做enhanced DBS check 一定要有地址証明。除非你已經租佐屋，或者有水電費單係你個名，唔係最易可以拎到既地址証明就應該係喺Lloyd Banks開戶口，點解Lloyd Banks？因為佢哋係唔駛地址證明都可以開戶口啊。
（其實如果我唔係租樓，而又無交水電費，點先可以有地址證明呢？）
不過，搞enhanced DBS check都唔算最煩。
最貴最煩既應該係良民証。
講良民証之前，少少題外話，enhanced DBS check其實都要五十鎊，依家都唔知請我間學校會唔會出定係要自己俾，聽日去學校交文件先知。不過，我之前試過報學校中介公司，呢啲中介公司會有一堆學校搵佢地搵人緊急代課或者做助教，抽佣高都算（一日七小時約七十鎊人工，幾乎最低工資），仲要自己先俾五十鎊做enhanced DBS check，真係「未見工先收五十大鎊」啊，一陣做完enhanced DBS check之後佢無工派俾我點算。同埋enhanced DBS check跟公司，佢可以唔俾返個結果我，咁我之後搵其他工又要再俾錢做過。加上嗰個Agent勁無禮貌，所以我最後決定自己繼續搵多陣先再幫中介公司。
講返良民証，首先，一搵良民証資料，就要去某組織既網頁。見到某組織既口號，忍唔住冷笑佐一聲。估唔到離開佐香港都仲要同呢個組織有瓜葛……
首先，除非你可以喺香港已經搵到工而又有辦法搵到政府部門話你要良民証，否則你係無辦法喺香港申請到良民証。
當你唔喺香港，就會好煩好貴。我暫時知道係要去倫敦警局打指模，收一百鎊仲要預約。預約個系統仲要無得揀時間，佢直接俾最近既期你，我琴晚申請已經要十二月二十九日先可以有期。
然後就要去搵政府部門寫信，又係要約時間同埋又要五十鎊。我依家其實唔肯定要唔要良民証，聽日去學校先知，如果要，我會問下學校可唔可以幫我搵教育局出信……但係網上又有人話某組織唔接受「搵工」做申請良民証既理由。
之後就係要填表同寄返香港再搵人幫你交某組織，又或寫張香港銀行既支票寄去某組織——因為我無支票啊……我無支票既原因係因為我簽唔到自己個名。
所以，如果你有既話，
記得帶本香港銀行既支票薄。
我估成個過程要兩個月先得，因為我最近收到香港AIR MAIL過黎既信，寄佐兩個星期啊。
本身一月開學就要開工，如果真係要良民証既話依家其實唔知可以點算……希望唔會搞到無佐份工啦……
