寫完上一篇文之後一日，就收到電話留言，話想約我兩日後早上八點見工。
早上八點！？
都係既，因為係一間中學，應該係想睇下求職者可唔可以準時返到學校掛？
咁我就用Citymapper睇下點樣去間中學，啲行程係由四十五分鐘到一個半鐘不等：可以只係搭巴士（最便宜，一鎊半，但係最慢），搭巴士轉唔同既鐵路程（唔係最快，大約一個鐘，但係我可以最遲先出門口，成六鎊）……
最快其實係喺我屋企行二十分鐘去火車站，搭半個鐘去London Bridge (is falling down)方向既火車，再行十五分鐘去學校，全程五十分鐘，三鎊幾。不過我反而要早好多出門口……
點解快啲得係要早啲？
因為我屋企去嗰間中學既火車喺八點前係一個鐘一班，所以我要六點四出門口行去搭六點九既火車。
其實六點四出門口，我可以搭最便宜既巴士都夠時間，因為咁早其實唔會塞車。
不過，因為搭巴士要轉車，我又人生路不熟，加上路痴，為免有乜意外，例如搭錯車，於是我都係選擇行去搭火車，因為我本身已經識行去火車站，而到達學校嗰邊既火車站，有成四十五分鐘俾我搵路，無理由咁都搵唔到啫，所以應該係最穩陣。
於是琴日朝早，天寒地凍，我五點九就要起身。
五點九未瞓我就試得多，五點九起身我已經唔記得對上一次係幾時嘞。
食個早餐灌佐杯咖啡，六點四就出門口摸黑去見工...…攝氏五度既寒風行二十分鐘，真係幾惡頂。沿路都無乜人，只係間唔中有人踏單車。（英國好興cycle to work。）
六點三十八分行到去火車站，稔住大把時間，於是搵架火車係邊個月台。唔，喺月台一。
我入站就係月台二，見到啲指示得去月台三同四，於是我就問職員點去月台一。
職員叫我向前行上天橋過對面就係，點知一過對面，見到月台啲牌無一架係去London Bridge，再睇下附近既指示，見到話月台一要上返天橋過對面。
嗰時已經係六點四十分，因為走佐班車我就會好大鑊，於是我就跑返過對面月台，問一個等車既路人月台一係邊，佢叫我向前行就會見到。
原來月台一係短過月台二，向前行少少就已經係，既係咁：
火車軌｜ 入口
火車軌｜月台二｜
火車軌｜月台二｜
火車軌｜月台二｜
火車軌｜天橋入口｜
火車軌｜月台二 （我問路人的位置）｜
火車軌｜月台二｜
火車軌｜月台二 ———月台一｜火車軌
火車軌｜月台二 — — — 月台一｜火車軌
