TLDR：黎英國，一定要裝Citymapper。搭車前，最好用一用Citymapper睇下你既行程有冇阻滯。因為佢會實時更新交通情況，你可以睇到你等緊既巴士／火車下一班幾時到，要轉既巴士幾時去到你個轉車站。
呢篇係記錄我第一個星期返工既苦況，成篇文都係憤青MODE。主旨係TLDR度寫佐勒，睇落唔對路請隨便棄文。 :P
之前講過，返工最難適應既係英式鍵盤。不過，我第一個星期返工，最難適應既並唔係份工本身任何野，而係「返工」個過程。
第一個星期返工，我仲住阿妹屋企。佢屋企行去火車站要二十分鐘，喺英國好正常，我本身鐘意行，所以都稔住無問題。
見工嗰日，我搭一程火車，架火車一個鐘一班，都無所謂嘅，咪早啲啲出門口，去到公司附近搵間餐廳飲杯咖啡啦。不過，嗰日到學校門口，又凍，就咁Google Map又唔覺得有任何咖啡店，方向盲既我又好驚行錯路之後搵唔返學校喺邊，於是唯有係學校門口食西北風半個鐘。
見完工，因為實在太肚餓，於是係附近求其搵間餐廳食佐個漢堡包同飲佐杯咖啡。杯咖啡貴過個漢堡包，但係好難飲。（又或者係我太肚餓所以個漢堡包唔好食都變成好食？）
