上次講到我去睇完£850一個月既小型劏房式studio，第二日就去睇一間House share。
House share喺我細細個睇新聞成日都聽到既水晶宮（Crystal Palace）。
「水晶宮，我細細個就聽過呢個名架嘞」
細個成日聽到呢隊波架，因為佢個名好得意，所以特別有印象，點解近年好似消失佐咁嘅。
當然，搵水晶宮就唔係因為聽過佢個名，而係因為返工方便，無論火車同巴士都係一程車就到：火車二十分鐘，十五分鐘一班；巴士要差唔多一個鐘，十分鐘一班。去我阿妹屋企，行路一個鐘左右，揸車就只需要十分鐘，所以水晶宮好自然係我睇既其中一個地區。
而我搵到既House share位置亦都好方便，喺火車站同巴士站中間：七分鐘到火車站，八分鐘到巴士站，方便過£850一個月既小型studio，而且只要£600一個月，水電上網電視牌照巿政局稅全包。
全包，唔只係錢既問題，更重要係唔駛煩。自己租，又要報巿政稅又要搞保險又要申請上網啊交水電費，好多手續要處理啊。
所以，House share唔好既就係要同人共用洗手間，同埋我間房喺地下，洗手間喺一樓，所以都有少少唔方便。
但係慳成£300一個月啊！
加上人工得雞膆咁多，如果洗手間無問題，個屋主又正正常常既話， 我會揀House share。而且，當時就快開工，唔快啲決定要朝朝兩個鐘周車勞頓咁返工真係唔係辦法，所以其實我都有啲心急要決定住邊。
我由阿妹度慢慢行去House share既地方，順便睇下四周既環境，都算係旺中帶靜，雖然好近交通中心，但係因為喺住宅區入面，都無乜人同車。我早佐十分鐘去到門口，稔緊㩒唔㩒鐘好。因為屋主約佐個五點，我又唔知佢會唔會係work from home㩒鐘驚會打擾到佢。
喺我稔既時間，有隻貓喺我身後行過，去到門口，對住門喵喵叫。
然後，道門就打開佐。
我見到一個大約六十幾歲婆婆開門，應該就係屋主。於是我就向佢揮手，話我早佐到唔知方唔方便早少少睇下間屋，佢話無問題，係我上一手租客仲喺房入面執緊嘢，所以未可以入我要租嗰間房睇住，我哋可以喺㕑房傾住先。
因為阿婆似乎真係要搵一個可靠既租客，而我本身寫俾佢既資料都有我少少既背景。睇開呢度既文友，應該都知我個背景其實幾複雜。屋主問我做乜會黎英國，係咪因為香港個情況，之後又問下中國既政治咁。講講下，屋主話：你話你之前做Audit，咁你係咪讀會計架？
