唔經唔覺，我已經黎佐英國三個月嘞。
未開工之前，我本身最擔心係聽唔明啲唔同地域既口音，又或者同事／學生聽唔明我講乜嘢。
結果我擔心既係無發生既，而斷估唔到，最難適應既竟然係部電手提電腦。學校電腦梗係慢，網絡亦都好慢，個屏幕只得１３吋，無滑鼠個trackpad好難用，但呢啲都唔係最大鑊。
開工嗰日，人事部同事俾佐一封打印出黎既電郵我，上面有我個登入名稱同密碼。
啱啱開工，我未有手提電腦，於是我喺課室既電腦試下登入，因為人事部叫我要快啲檢查電郵，有好多通告同資料電郵佐俾我。
但係我登入既時候，個系統一直話我密碼錯誤，因為我要去睇堂（shadowing，即係跟一個同事去上堂睇下佢做乜嘢），於是另一位同事喺小息帶我衝佐落去電腦部搞。
點解同事要同我一齊衝落去？一來我唔知電腦部喺邊，二來佢要借部手提電腦俾我示範俾電腦部職員睇我入唔到密碼。
電腦部職員：「可能我之前入錯，我幫你改過個密碼啦。」
電腦部職員好快改完，叫我再試，但係我都仲係登入唔到。
然後，我無意中發現我打大階會出兩粒＊，於是我話：「咦，係咪個鍵盤有問題，你睇下，我打大階Ｓ會出兩粒＊架。」
因為我未登入到，所以我試唔到個鍵盤。
電腦部職員：「咦，係喎，等我試下……無事啊。」
我再試，又係兩粒＊，我：「唔係喎，都仲係有兩粒＊啊。」
電腦部職員Ｒ晒頭：「係喎，點解既……」
我：「但係唔係喎，我喺課室既電腦都係登入唔到。」
擁有手提電腦既同事：「唔，我個鍵盤應該無問題架。」
於是我慢動作咁輸入密碼。
同事：「你好似㩒多佐個＼啊……」
我低頭，大驚道：「咦點架個鍵盤咁怪架！」
心稔：「shit, 個shift咁短既。」
無錯，因為我係完全無稔過個鍵盤會唔同，於是返工第一朝就做佐一件超級白痴既事，好對唔住個計算機工程既學位。
（仲有個@同”啊，我嗰日喺個位都搵到@搵佐成分鐘啊。然後我返屋企又要用返US layout，頭兩星期真係搞到我好亂。）
簡單講返份工本身，我算適應得好快。
我係星期一開工，星期二下午老細問我自己去課室支援學生得唔得，定係要shadowing多一陣，我話自己去應該都可以。
返工第二個星期一朝早，我喺課室同一個學生打招呼，同組既同事入黎，見到我，問：「咦點解你喺呢度既？呢堂我睇開架喎。」
我：「我個時間表係咁寫啊….」
同事：「係喎，咁奇怪…咁你上個星期呢個時間喺邊架？」
我：「呃，我上星期呢個時間係第一日返工，喺HR搞緊文件….」
同事：「Really? 我覺得你返佐成個月嘞…咁等我問下老細佢想點啦，我唔介意有空堂架。」
喺學校入面，另一樣要小小時間適應既係呢邊所有學生都係叫職員做sir同miss，有時會加埋個姓，但係我個姓太難讀，同埋喺走廊有啲學生都會同你打招呼，頭幾日，我係完全唔為意啲學生係叫我，我要行過佐先醒起，咦，佢頭先係咪叫我……加上，間學校好大，方向盲既我成日揸住個時間表四圍搵課室，因為轉堂得五分鐘時間，其實有啲趕，好多時啲學生見到我搵課室（又其實可能係我阻住晒條路），都會好友善：「hey miss, may I help you?」
