唔經唔覺，我已經黎佐英國三個月嘞。
未開工之前，我本身最擔心係聽唔明啲唔同地域既口音，又或者同事／學生聽唔明我講乜嘢。
結果我擔心既係無發生既，而斷估唔到，最難適應既竟然係部電手提電腦。學校電腦梗係慢，網絡亦都好慢，個屏幕只得１３吋，無滑鼠個trackpad好難用，但呢啲都唔係最大鑊。
開工嗰日，人事部同事俾佐一封打印出黎既電郵我，上面有我個登入名稱同密碼。
啱啱開工，我未有手提電腦，於是我喺課室既電腦試下登入，因為人事部叫我要快啲檢查電郵，有好多通告同資料電郵佐俾我。
但係我登入既時候，個系統一直話我密碼錯誤，因為我要去睇堂（shadowing，即係跟一個同事去上堂睇下佢做乜嘢），於是另一位同事喺小息帶我衝佐落去電腦部搞。
點解同事要同我一齊衝落去？一來我唔知電腦部喺邊，二來佢要借部手提電腦俾我示範俾電腦部職員睇我入唔到密碼。
電腦部職員：「可能我之前入錯，我幫你改過個密碼啦。」
電腦部職員好快改完，叫我再試，但係我都仲係登入唔到。
然後，我無意中發現我打大階會出兩粒＊，於是我話：「咦，係咪個鍵盤有問題，你睇下，我打大階Ｓ會出兩粒＊架。」
因為我未登入到，所以我試唔到個鍵盤。
電腦部職員：「咦，係喎，等我試下……無事啊。」
我再試，又係兩粒＊，我：「唔係喎，都仲係有兩粒＊啊。」
電腦部職員Ｒ晒頭：「係喎，點解既……」
我：「但係唔係喎，我喺課室既電腦都係登入唔到。」
擁有手提電腦既同事：「唔，我個鍵盤應該無問題架。」
於是我慢動作咁輸入密碼。
同事：「你好似㩒多佐個＼啊……」
我低頭，大驚道：「咦點架個鍵盤咁怪架！」
