讀Gary Ho 的監考文後，勾起我不少監考回憶。
首先，唔知係咪依家DSE或者外國既公開試唔駛帶文具。有啲考生，真係鉛筆？無！擦膠？無！試過有人考統計學入門連計數機都無。大佬，我哋係無可能準備埋計數機架，帶一打中華牌鉛筆已經算係仁至義盡架啦。見到呢啲學生兩梳蕉咁嚟考試，老溤咁問我哋攞文具，莫非佢哋誤以為百無一「物」是書生。
而且，有時真係好懷疑佢哋係咪自己去考公開試，連基本考試規則都唔識，例如打開本書或筆記放地下。問佢哋仲扮唔知點解喺地下，唔通有人行過踢佐放凳㡳本書出黎，然後又有風吹開佐本書？
好彩呢啲學生唔多，不過當你個科超過一百人時，就梗有一兩個係咁。我開頭都會有想（佢）死既感覺，依家已經慣佐。
不過，監考最令人想死既原因其實唔係奇怪既學生，而係場地安排。我哋幻想既試場係咁：
實際大學好多既試場係咁：
如果你嗰科好多人，你甚至會獲分配到一個咁既試場：
係咪好大好Grand呢？呢個就係敝校既大會堂Grand hall，真係會用黎舉行正式音樂會架。
我挑過（挑—— “Tu”toring）一科入門課，有幾百個唔同系既學生， 考試組就係安排佐我哋去呢個場考試，真係好大……鑊。
