五月份，又到大學畢業生搵學術界工作既高峰時間 — 學術界好多工都係等做緊既人報到Master/PhD先出廣告，而四月尾大部份同事都會知自己有無書讀，有書讀既人就會辭職，而無書讀我都會鼓勵佢哋搵過份工 — 因為轉project儲多啲唔同既經驗對佢哋再報Master/PhD有利 — 雖然我心底裹想佢哋留低，因為唔駛再train過。
而我呢啲細project一腳踢，screen CV同見人既都係我，見到好多申請者因為低級錯誤連見工既機會都無埋，所以將常見既七宗罪列出，希望幫到大家（既學生），話晒呢度都好似幾多人喺高等教育界教書。
1）寄hardcopy貼唔夠郵票 （死亡率：99.9999999%）
對唔住，我哋係唔會貼錢去郵局攞封信㗎！（唔係同求職者講，係同郵差叔叔講 。不過我哋寄回郵信封俾學校一定會貼多過所需既郵資，我估都補返數啦。）要project貼錢事少，要我哋搵個同事專登去攞份CV事大。當然，如果佢連Research Assistant都無寫，我哋會焗住要去攞，不過我都幾肯定我哋唔會見佢。
致命原因：我哋根本無去攞你份CV
2）中文CV（死亡率：90%）
個廣告明明得英文，寄中文CV嚟我會非常懷疑佢嘅常識，同埋大學真係有好多人唔識睇中文，雖然我個廣告要求識中文，但係唔代表我哋識。除非啲中文真係十分出眾，否則我應該都係唔會short list佢。
致命原因：無common sense
3）串錯字，串錯好多字 （死亡率：50-70%）
我唔係想捉字蝨，但係見到Dear Sir/Madam寫Dead Sir/Madam嗰刻我真呆咗。
不過點都唔夠我同事收過嘅Best retards經典。
因為真係好多人會串錯字，所以就算係犯以上既搞笑錯誤，我哋都未必會判死刑嘅。唔好錯得太多太離譜好多時我哋都算，但係如果send個word既CV黎，而我一開見到好多紅色蛇仔，好大機會會直接drag去XXX嗰個folder (XXX＝唔駛稔）。
致命原因：唔小心，我點知你會唔會寄 dead parents俾家長⋯⋯
