COVID-19第三波停課前一天，好好彩約到一間小學收data。因為人手短缺，於是難得可以上陣同一班小四小五學生收data。
我：「各位同學午安，我喺嚟同大家做中文研究架……」
同學甲興奮：「嘩研究啊？要研究乜嘢啊？」
同學乙緊張：「你喺咪嚟收集我哋既DNA架！？」
我：「唔係啊，我做中文學習研究，唔駛收集DNA既……」（心稔，小朋友你都好緊貼時事喎，嗰排大家都仲未算好熱烈討論健康碼。）
同學乙無咁緊張：「咁都好啲。我以為你要收集我哋啲DNA睇下邊個中文叻啲，我啱啱睇緊《 ＸＸＸ基因ＸＸＸ》有個研究係咁架。」（唔記得個書名，淨係記得有基因兩隻字。）
我：「你梗係好鐘意科學嘞。放心，我哋只係需要你哋作一篇文同填問巻，唔會收集DNA既。」（唔知呢位同學係真係留意時事定咁啱佢真係睇緊DNA既書。）
幾個同學嘆氣，有啲仲七情上面、誇張抱頭：「吓！作文……」
在旁幫手睇場既中文老師忍唔住：「吖，你哋好唔鐘意作文咩？」
同學甲續道：「琴日先作完，今日又作。我寧願俾我啲DNA你算嘞。」
我：「可惜我唔係做DNA研究啦。好嘞，大家攞支鉛筆同擦膠出黎先……」
同學丙煞有介事：「咪住，作文喎，咁啲紙上面咪有我哋既指摸囉！咁咪有DNA囉！」
我為佐可以快啲開始，一邊開始派作文紙，一邊回應：「指摸無DNA架喎。」
同學乙認真：「係啊，指摸無DNA架，就連你啲皮屑都無架，唔駛咁驚啊。」
同學甲：「咁頭髮呢？我哋作文會Ｒ頭喎，會甩頭髮喎。」（一邊R頭示範）
同學乙：「有埋毛囊都得既，不過要逐條頭髮check有冇毛囊，應該好少會咁做研究啊。應該係查案搵證據先會……」
我：「係啊……好嘞……」（正常我都唔介意同佢哋吹下水，但係因為呢次安排時間好緊迫，家長夠鐘就會黎接放學遲佐會好煩，所以我好想快啲開始。）
一直無出聲既同學丁問：「樣樣都唔得，咁點樣可以收集DNA啊？」
同學甲：「抽血得嘞掛？」
同學乙：「得既，不過通常都用係口腔拭子，既係用棉花棒係口入面掂下啲粘膜，唔駛打針吖嘛。」
我：「無錯啊。好嘞好嘞，我哋要開始作文嘞，你哋都想快啲返屋企吖嘛。作完再討論啦……」
本來無稔住分享上面既對話既，不過咁啱見到麥ＸＸ以下既「遐想」：
睇到既時候，腦入面響起同學乙把聲「唔可以，剪出黎既頭髮係無毛囊。」當然，一眾網友係唔會好似小學生咁善良認真解釋俾佢聽，好似我咁，就梗係要幫佢cap圖留「荒」百世啦。
