有少少搞笑:點點羊羊點羊羊(小學篇)

思然 oce
3 min readMay 20, 2018
Photo by Christopher Burns on Unsplash

測試其中一部份要小朋友做二十題選擇題,只有ABC三個選項。

小朋友一唔識就「點點羊羊點羊羊,點著誰人做大肥羊」去選答案。

過佐幾次,我同佢講:「你咁點條條都係C架喎,嗱,你睇下,『點點羊羊點羊羊,點著誰人做大肥羊』成句十五個字,如果三個一組,即係ABC咁,五次之後啱啱無晒喎……」(同時將ABCABCABCABCABC寫喺「點點羊羊點羊羊,點著誰人做大肥羊」上面。)

佢驚訝:「係喎,哎唷,點解我上面數到B既……」之後佢認真咁改番做C,亦由撞啱改到錯。

今日又遇到一個串串貢小朋友。
我:「宜家我會要你默啲字……」
小朋友插咀:「咁我要睇下啲字先!」
我:「俾你睇就唔係默書,係抄書啦。」
小朋友:「睇下啫,你估我真係會記得咩。」

收到新的評估光碟,因為要看看有甚麼題目,被迫要做一次。聽著那把溫柔的女聲重覆著相同的指示,好不容易地做了五十條題目,終於聽到「同學,做得好好喎,呢部份所有題目完成啦。」

正想鬆一口氣時,見到屏幕竟顯示出「小休三分鐘」,我不禁衝口而出:「得三分鐘?唔係啊嘩……」

然後我即刻去佐買啲靚啲既貼紙用黎鼓勵小朋友。

和小朋友做測試到了一半後,因為很累,不夠氣說話,所以有點氣若游絲。
小朋友:「點解你講嘢講到好似電腦入面把聲咁嘅?」

我和小朋友做完測試帶他去找媽媽,見到小朋友的三歲半弟弟在地上爬。
媽媽問我:「咁係叫四腳爬爬定係三腳爬爬啊?」
我聽得一頭霧水:「四腳爬爬吧。」
媽媽對著弟弟說:「你聽到啦!中文老師都話係四腳爬爬啊…」
弟弟一邊在爬,一邊在大笑:「唔係啊,三腳爬爬,哈哈哈…」
我:「三腳爬爬?你似幫我抺地多啲喎。」
弟弟:「三腳抺地,哈哈哈!」(爬走…)
媽媽苦惱地:「激死人,都唔知佢做乜係都要話三腳…」
我:「可能佢數到自己得三隻腳啦…」(我諗呢個小朋友一定係成日爬,媽媽竟然無阻止佢抺地……)
媽媽:「點會啊?他識得數到十架。」
我:「估下咋,如果佢用一隻手指住自己啲手腳係度數,咁咪淨係數到三,當然,佢可能係度貪得意亂講啫。」

集體討論時間:

我:「生物」點解啊?
小朋友A:我知!生日禮物!

我:「古人」點解啊?
小朋友B:咪係古怪既人囉。
小朋友C:死佐既人啊!
小朋友D:不過要死佐好耐架喎,好似李白嗰啲咁啦。我阿婆雖然死佐,但係佢就唔算係古人啦。

思然 oce

PhD | Research Psychologist | Psychometrician | Computer Science Teacher | IT Auditor/Consultant | ex-CISA/CISSP | Top Writer in Humor | Work in HK, UK, USA