小朋友做電腦測試做到發火，對電腦講：「阿叔，你唔好玩我喎…我如果過唔到關我跟你姓！」
我：「電腦姓乜啊？」
小朋友：「姓電囉。哼，如果我過到關佢要跟我姓…」
小朋友過關後，大叫：「張腦！！知驚未！」
之後我無聊地將電腦個名改佐做Journal。
電腦聲帶解釋遊戲方法時，有啲小朋友會不滿：
－廢話少講啦！
－開始得咪啊？
－咁長氣，老人院都唔收你。
有一部份，電腦會讀錯字，小朋友要評分：
－又錯？打爆你吖嗱！
－搞乜鬼成日都錯架？悶死人咩。
小朋友測試期間，靠一張碌碌櫈不停表演高度動作，包括得一邊PAT PAT坐住張櫈自轉，然後開始想圍住我自轉兼公轉。
我：「喂，你坐好啲，唔好再轉，一陣跌親啊！」
小朋友：「你由得我啦，我跌死佐咪唔駛做囉。」
小朋友測試期間，不停「迄」櫈。
我一腳踩實張櫈：「唔好迄啊，一陣跌親啊。」
小朋友：「駛乜驚喎，呢度係醫院吖嘛！」
我：「呢度係牙科醫院，得牙醫咋喎⋯」
小朋友：「吓！？」（即刻坐得好好）「我最驚睇牙醫！ 」
打電話同家長約時間做測試。
家長：「佢妹妹都有報名架喎，可唔可以一次過做埋啊？」
我：「其實最好都係分兩次，因為得我一個人同小朋友做測試，如果你想一次過，要同妹妹喺外面等哥哥做完先⋯⋯咁你要留喺度等四個幾鐘架喎。」
家長：「吓！得你一個人做嘢㗎咋? 你做咩唔搵個人幫你打吓電話?」
（呢個問題你要問我老細喎。）
