小朋友做電腦測試，電腦：「如果你有問題就舉手問老師啦。」
小朋友冷笑：「哼，邊度有老師啊？」
我：「我咪係囉。」
小朋友：「你？你讀緊大學咋…未畢業唔算數囉。」
電腦評估程式很慢。
小朋友不耐煩：「咁慢㗎，好心你就唔好用hp啦，用埋啲咁渣既手提電腦…」
我：「咁你有乜好介紹？」
小朋友：「Sony同Samsung啦，我用緊，快好多㗎！」
評估之後，因為小朋友的媽媽遲來，便帶他到我個office，他問：「呢個位你㗎？」
我：「係啊。」
小朋友大叫：「乜你連電腦(即desktop)同printer都係hp㗎！你真係好傻…」
做電腦閱讀理解測試時，電腦說：「我一陣唔會讀俾你聽…」
小朋友不耐煩說：「車，緊係唔會讀俾我聽啦，話明係閱讀理解吖嘛，你讀埋俾我聽就係聆聽理解啦！開始得咪㗎！？」
電腦測試到一半暫停，畫面顯示「休息時間 按enter繼續」，小朋友一邊興奮地說：「好嘢！有得休息！」，一邊按enter……
於是，電腦測試繼續，小朋友慘叫：「又話按enter休息嘅！？」
電腦評估休息時間，小朋友問：「你識唔識電腦把聲個人？」
我：「識啊。」
小朋友靜了一會，然後轉話題。
繼續玩電腦評估，例題電腦講答案時，小朋友抱頭叫：「哎唷……」
我明明見到佢答啱：「你答啱喎。」
小朋友：「係啊。」
我：「咁你做乜哎唷？」
小朋友：「次次都好長氣咁解釋，好煩啊…弊，你唔好話俾電腦把聲個人聽啊。」
電腦向小朋友解釋如何做電腦評估，很煩很長氣。
小朋友向我說：「你好煩啊。」
我：「呃，係電腦好煩，唔係我。」
小朋友：「一聽就知係你把聲啦，你以為講得慢啲同長氣啲就呃到人咩……」（真係唔係我嚟㗎 -_-|||)
