小女孩見到同學講大話給老師責罵，和旁邊的小男孩說：「小朋友唔可以講大話架，講大話會甩大牙架！」
小男孩搖頭：「唔係喎……係個鼻會變好長好長好長啊！」
另外，我明白家長唔想小朋友睇電視同食麥當勞，但係當老師聽到小朋友認真咁同其他小朋友講「麥當勞既漢堡包係用狗糧做架！」同「睇得電視多對眼會流血架！」，而其他小朋友嚇呆佐，老師好難唔踢爆你個大話架喎……
其實小朋友好多都好誠實㗎，例如，小朋友交功課大叫：「老師，係咪畫得好靚啊？我阿姨做架！」
科學迷小朋友畫火箭，入面仲有幾個太空人，外面仲有好多星同星球，之後佢用黑色蠟筆喺火箭上面狂圈⋯
我：「呃，你係咪畫緊黑洞？」
小朋友：「係啊！黑洞好勁架！會吸佐架火箭架！」
我好欣賞佢好俾心機畫完幅架火箭再好俾心機油黑晒，唯有希望佢唔會俾老師鬧啦。
李老師幫K1一個小朋友著褸。
李老師：「要講乜野啊？」
小朋友：「要講乜？」
李老師：「要講唔…咩啊？」
小朋友：「唔該！」
李老師：「唔該邊個啊？」
小朋友：「唔該老師！」
李老師：「我係咩老師啊？」
小朋友：「咩老師？」
李老師：「李……」
小朋友：「唔該我！」
有個小男孩認大人的能力極差。今天他在後台見到我，叫：「謝老師。」
我：「今次叫啱，叻仔喎！」
小男孩興奮道：「我知，有兩個謝老師吖嘛！」
我：「係啊！」
小女孩插咀：「咁另一個謝老師喺邊啊？」
我：「唔知喎…」
小男孩搶答：「我知，其實另一個謝老師咪即係葉老師囉，一樣㗎啫！」
幼稚園有一位謝老師，而我也是謝老師。
某小朋友每次見到我，都會自言自語：「呢個世界真係好多謝老師。」
