十月三十日 陰天
今日約佐朋友食午餐，於是琴晚十一點半臨瞓教八點半鬧鐘。
“Alarm set for 10 hours and 2 minutes from now”
十小時之後？我有得瞓十個鐘？正啊。
咪住，十一點半到八點半唔係九小時咩？？
唔通我眼瞓到計錯數？
我開始數手指
「十二，一，二，三，四，五，六，七，八」
明明係九喎。（其實我會數手指已經證明我好眼瞓。）
我心稔無理由andriod會計錯架，咁應該係我睇錯，於是我再教多一次個鬧鐘。
“Alarm set for 9 hours and 59 minutes from now”
乜料啊！我係度猛改個鬧鐘設定，都係話仲有九個幾鐘。無理由會計錯架……
我因為好想瞓，稔住求其改做七點半咁佢就會八個幾鐘之後響，咁就算計錯我都唔會遲到。
果然“Alarm set for 8 hours and 55 minutes from now”
但係計錯時間呢件事實在係太古怪，我決定Google一下。
一開電腦，就見到：
原來係夏令結束！
安心既我就去佐瞓，今朝起身，勁後悔無試下如果我較一個鬧鐘係兩點半，佢會係計第一個兩點半，定第二個兩點半呢？
好想知既我google佐半個鐘都搵唔到答案，於是我就較佐一個提醒，我下年夏令結束嗰日就會試。
上到朋友架車，我哋好快就發現點解我哋會遲到成半個鐘明明預早佐好多下，先醒係架車個時間無自動更新。
朋友一邊較架車個鐘，一邊話：「我今朝先較晒成屋既鐘。」
去到食飯時，朋友不停望錶，話架車就黎泊三個鐘要走。嗰時係一點十分。
另一個朋友話：「兩點半先夠鐘喎。」
朋友話：「都差唔多要埋單嘞。」
去到一點二十五分，我哋開始埋單，埋得單黎都一點三十五分，佢就好急咁想去攞車，咁我就同其他朋友講拜拜。佢就拉住另一個朋友話要去攞車先。
（補充資訊：我朋友唔係因為驚唔俾多一個鐘錢，英國呢邊好多時都係唔駛錢泊一至三個鐘不等，但係超時係罰幾十鎊架。）
我見佢咁急，我話：我哋明明十一點半泊車，應該兩點半先攞車，唔駛咁急啊。
佢：「咦……啊！！！我未較錶！！！你哋做乜無人提我啊……」
我同朋友：「點知你無較錶啫……」
好彩今日係星期日，唔係應該會有其他混亂情況。
今個星期學校假期，聽日開學，唔知課室啲鐘準唔準呢？
