小朋友甲：「你知唔知我阿婆最鐘意玩乜啊？」
我：「Angry bird?」
小朋友甲：「哈哈！唔係啊，佢都唔識英文既！再估吖！」
我：「唔知喎⋯⋯」
小朋友甲：「玩股票機啊！」
我：「玩股票機？點玩架？」
小朋友甲：「唔知喎，阿婆成日喺度襟下襟下，好似好好玩⋯」
小朋友乙：「股票機我知！股票好易玩架，啲股票升你就有錢賺，不過啲股票跌你就無晒啲錢囉！」
小朋友送上仿薑餅人曲奇餅，說：「你一定要食啊！我同爹地媽咪一齊整架！我有份搓麵粉，用個模級個個人同埋黏眼睛架！」
我：「好靚喎，多謝你…」
小朋友：「你記住要食一隻腳先，再食一隻腳，之後食佢個頭，最尾先食佢個身體喎！」
我：「哦，等我食之前影張相先⋯放邊好呢⋯唔，你估張枱乾唔乾淨吖拿？」
小朋友：「你放喺我隻手度啦！好乾淨架！」
小朋友甲：「我媽媽係會計師。」
小朋友乙：「我媽媽係工程師。」
小朋友丙：「我媽媽係…我媽媽係…我媽媽係我媽媽！」
返幼稚園見老師，遇到上暑期班的一班小朋友。
小朋友甲：「謝老師！！！你做咩咁耐唔返學啊？」
小朋友乙插咀：「放暑假吖嘛！謝老師梗係去佐旅行啦！」
小朋友甲：「你做咩去旅行！？」
小朋友乙：「放暑假囉！」
我完全無搭咀既機會……
上課前，班主任同小朋友講：「謝老師係睇你地乖唔乖，然後會寫低啲乖既小朋友個名架！」
中段有外藉老師教英文，班主任走佐，一個小朋友走埋嚟我度，壓低聲線講：「謝老師，你快啲寫我個名啦！」
