幼稚園低班小朋友將要練習梁詠琪的Today來唱給高班畢業的小朋友。於是，老師在茶點時間播這個MV給小朋友看。
小朋友都在專注地吃茶點和玩，我和班主任和實習老師在一旁閒聊。
實習老師：「嘩，呢個係梁詠琪嚟架？咁既樣㗎？」
班主任：「呢首歌喺我讀書嗰時好紅架喎，你無睇過咩？」
實習老師：「梁詠琪我哋嗰時唔興啦，我哋唱Twins架。」
班主任：「我同你都唔係爭咁遠啫⋯⋯謝老師你有冇聽過吖？」
我：「我嗰時梁詠琪都好紅架。」
班主任指住梁詠琪問：「小朋友，你哋有冇人知道呢個姐姐係邊個啊？」
全班得陳小明一個舉手。
陳小明：「梁詠琪！」
班主任向實習老師說：「你睇吓，陳小明都知啊！陳小明你點解會知既？」
陳小明滿足地笑。
班主任：「你媽咪都鐘意梁詠琪啊？」
陳小明搖頭，尷尬地笑：「你哋啱啱講吖嘛～」
老師講故事時說起看電視，問小朋友：「你哋有無睇巨輪啊？」
小朋友踴躍舉手答「有啊有啊……」
老師：「嘩咁多人睇啊？咁講乜嘢架？」
小朋友踴躍舉手。連一個很少舉手，惜字如金的小朋友也舉手，老師當然叫他答。
他緩緩地吐出四個字：「賣花生糖。」
（我沒有看巨輪，但據聞此劇是幫鉅記賣廣告，所以我想賣花生糖應該是一個很精準的總結吧。）
小男孩的樣子很累。
我：「你個樣咁累，琴晚好夜瞓？」
小男孩：「係啊。」
我：「睇電視啊？」
小男孩：「 係啊。」
我：「睇西遊記？」
小男孩（激烈反應）：「梗係唔係啦！西遊記都唔好睇！」
我：「唔好睇咩？我仲以為你哋鐘意睇妖怪添。」
小男孩：「幪面超人O好睇好多喎！」
我：「咁你睇乜睇到咁夜啊？」
小男孩：「女人俱樂部。」
我：「吓？講乜架？」
小男孩：「咪講啲女人囉。」
其中一組小朋友最近不停說oh my god。
我問其中一位小朋友：「你哋係邊度聽到oh my god架？」
小朋友：「hahaha，乜你唔知咩？」
我：「唔知啊……」
小朋友：「神探哥倫布啊！你無睇電視架咩？」
我：「無睇啊……」
小朋友：「我知！你咁遲放工梗係無得睇啦。早啲返屋企咪有得睇囉！」
有一排，小朋友成日講：「我哋玩按摩３６小時吖！」
之後佢哋係度「嘟，嘟，嘟⋯⋯」
後尾我先知佢哋扮緊on call 36小時既醫學儀器聲。
