（清明節前夕）
老師：「有冇人知聽日係乜野節啊？」
眾小朋友：「復活節！」
老師：「唔係啊，聽日係清明節！你地知唔知清明節係乜啊？」
小朋友甲：「我知，有好多福字吖嘛！」
老師：「福字係新年喎。」
小朋友乙：「我知，要送花俾人架！」
老師：「呃，送俾邊個啊？」
小朋友乙：「媽媽！」
小朋友丙：「仲有爸爸啊！」
幼稚園小朋友要自備餐具和毛巾盒吃茶點。今天，一個小女孩把毛巾從毛巾盒拿出來，用力地扭出一灘水在杯裏，然後一飲而下，並滿足地笑了……（快速得我想制止也來不及）
我一直擔心她會不會肚痛。幸好到放學她仍安然無恙。
同小朋友做task，通常都係話：「我依家同你去玩啦。」
今日我喺課室觀察，有個小朋友篶我：「同我玩！」
我：「我唔得閒啊，你搵其他同學玩啦。」
小朋友：「哼！你唔同我玩，下次你叫我同你玩我就唔同你玩！」
老師教K1小朋友扮護士幫病人登記，要問病人「你叫乜名，幾多歲？」。
護士認真地替了四個病人登記，到第五個病人時……
護士：「你叫乜名啊？」
病人：「ＸＸＸ」
護士：「你幾多歲啊？」
病人：「三歲。」
護士搖搖頭：「乜個個都係三歲架！」
小朋友：「謝老師你幾多歲啊？」
我：「唔話俾你聽！」
小朋友：「我六歲啊！你幾多歲啊？」
我：「我唔信，你四歲半咋喎。（我有佢出生日期。）」
小朋友：「咩啊！咁我好快五歲啦，好快六歲啦，好快大過你添啊！謝老師你幾多歲啊？」
（大雷暴之後的一天）
我：「咦，你個樣咁累既？你琴晚好夜瞓啊？」
小朋友：「琴晚⋯雷暴啊⋯嘩啊⋯嚇到我喊一聲都喊唔出啊！」
