小朋友：「我最鐘意同xxx玩手指！」
我：「玩手指？點玩啊？」
小朋友：「即係包剪揼啊！」
小男孩：「我最鐘意砌高達！」
我：「你識砌高達咁勁？」
小男孩：「係啊！我同爸爸一齊砌。不過，其實全部都係爸爸砌，佢話我淨係負責MEET，不過，爸爸又同媽咪講話佢淨係負責教我砌架喎，但係其實我都無砌過架，次次都係爸爸砌晒喎。」
我：「咁你有冇同爸爸講你想砌啊？」
小男孩：「有啊，爸爸次次都話下次買個易啲既俾我砌，但係佢次次開佐都話好難架。」
小男孩：「我淨係鐘意同男仔玩喎～」
我：「點解啊？」
小男孩：「啲女仔成日玩埋晒啲公主，好低B！！」
我：「係啊，咁你哋啲男仔又鐘意玩乜啊？」
小男孩：「幪面超人FOURZE，好型架！」
小男孩興奮做動作，然後靜佐，之後好尷尬：「其實都有啲低B⋯⋯」
我：「你睇電視有冇見過啲好搞笑既嘢啊？」
小男孩：「有啊，街頭魔法王好搞笑架！」
我：「係啊，我無睇過喎，啲魔法好搞笑架？」
小男孩：「唔係啊，入面有個女仔成日尖叫佢好搞笑架！哈哈哈⋯⋯」
有個小女孩話自己唔鐘意Elsa，鐘意Musketeer…（後來先知係Barbie and the Three Musketeer，我開頭仲以為係我細個睇書既三劍客）
我：「你唔鐘意Elsa？你知唔知點解其他小朋友咁鐘意？」
小女孩：「我知！因為我問過好多個小朋友！因為佢識呼冰，佢都好靚，仲有佢係藍色，好多小朋友都鐘意藍色，但係啲男仔唔鐘意，好多女仔為佐Elsa條裙藍色所以就鐘意佐藍色，之前係鐘意粉紅色或者紫色。」
K2有個女仔砌唔到個玩具，走去同一個男仔講，男仔二話不說搶佐個玩具砌埋之後俾返女仔；之後女仔拆佐個玩具，又搵過第二個男仔講砌唔到；如是者佢搵佐六個男仔砌玩具。唔通呢個係佢識男仔既方法？
