Member-only story
有少少搞笑：整薄餅派對
是月為本校的職員身心健康月（wellbeing month——wellbeing好像很難找一個好的中文翻譯，這是我強行翻譯的）。活動種類都有幾多：飄書、陶藝、星期五熱早餐、星期四懷舊零食、社際運動比賽、社際問答比賽、因為每個職員都有自己既社，就好似你睇哈利波特咁。我學校都係有四個社，不過因為老師通常都要跟自己班嗰個社，所以佢哋久唔久都會轉社，社際比賽對老師的意義其實也不在於社際，只在於比賽和之後去酒吧吹水而已。
啲活動睇黎都幾有趣，但係其中我見到逢星期一晚六點也有個Pizza Making Party ，我想「整薄餅派對」到底是甚麼活動？英國人大概沒有阿茂整餅這種說法吧。星期一晚搞派對都好奇怪，第二天一大早要返工啊。
於是我按下連結睇下係乜嚟既：
你睇唔睇到我睇錯乜嘢呢？
我一直都以為係Pizza Making Party，讀到第二段「if you are intending to stay late and mark, or just work generally」先發見係mark… 薄餅改巻派對。
老老實實，我間學校老師普遍都係晨早七點半返到學校，星期一就已經要做嘢做到六點之後，而且依家英國六點天已經黑晒，咁算係乜鬼身心健康活動呢？
咁當然，其實十一月真係好多巻要改，所以就算無整餅派對，老師都係要留到好夜，所以提供晚餐等老師唔駛稔食乜，又或者起碼一定記得準時食晚餐，都算係身心健康既。尤其呢邊我哋放飯時間好短，大部份老師午餐都係罐頭湯、三文治、沙律或者Tesco Meal Deal，極度求其。所以一個正式既晚餐其實好重要。
題外話：做學校，好難身心健康，工時長人工又少。我今日同一個做佐幾年TA既同事講開黎緊可能罷工爭取加人工，佢話佢依家返緊三份工，日頭返學校，夜晚返酒吧做bartender，星期六日仲要幫人補習先夠生活。我心稔，呢個咁似經典笑話：「夜晚做酒吧日頭仲返學係勵志故事；日頭返學夜晚返酒吧就係墮落故事」，可惜係真人真事。而佢人工已經高過我。
想我哋有身心健康，最直接既方法其實係加返有通脹咁多既人工。喺教員室間唔中都聽到啲同事講唔想開暖氣住因為電費好貴，買少佐水果啊，真心覺得好慘……老師既人工，單身就話夠洗仲可以去下PUB，但係有細路既老師其實真係唔夠洗。
