我有個同事阿悅，佢喺學校做佐二十年，好資深亦都好好人。不過，佢有時都幾大頭蝦，例如佢成日攞人哋啲嘢以為係自己既。
請留意，我同事不是我。雖然佢做既嘢我估我都好有可能會做，但係呢個真係唔係我。
上堂鐘響，阿悅拎起自己個袋，再隨手拎起枱面部手提電腦就走。
我老細：「你要幾多部手提電腦？」
阿悅：「一部啊。」
老細：「咁你做乜拎住部手提電腦？」
阿悅：「我要去上堂啊，我不嬲都帶手提電腦……」
老細：「但係你拎佐我部手提電腦……你唔係揹住佐一部啦咩？」
阿悅揹住一個無拉拉鍊既電腦袋，好明顯入面就有佢部手提電腦。
我哋個個人都係將課室鎖匙扣喺職員証，而人人既職員証驟眼睇都係差唔多。
喺教員室，一老師見到阿悅，講完早晨之後，忽然講笑語調咁大叫：「阿悅，我想殺死你！」
阿悅：「乜嘢事？」
老師：「你做乜攞佐我個職員証！？我搵佐成朝啊開唔到燈啊！」 （我哋學校課室開燈係要做鎖匙既。）
阿悅一頭霧水：「吓……我無攞過啊……」
老師：「你低頭望下就知......」(Please look down and you will see….)
阿悅戴住兩張職員証。
因為我咁啱係教員室，阿悅就同我講佢呢排唔知做乜成日攞錯人哋啲嘢當係自己，同埋以下呢件事：
阿悅同一英文老師開會，臨走，老師問：「你可唔可以借你張職員証俾我啊？」
阿悅：「可以，你唔記得帶？」
老師：「唔係，我見你啱啱攞佐我張職員証，我稔住交換用都可以既。」
佢同我講完，我忍唔住話：「咁如果我有嘢搵唔到，我知要搵邊個嘞。」
阿悅：「係，你應該黎搵我先。」
呢個時候老師行入黎。
阿悅：「陳老師，你搵返你部電話未啊？」然後轉個頭同細聲我講：「嗱，今次我無攞到架。」
好嘞，我一定要再講多次，阿悅真係唔係我啊。睇開呢度都知我唔介意擺自己上枱架喎。不過我發現英國人真係好少會直接講心入面想講既嘢，即係「你拎佐我啲嘢啊。」而係會間接咁講，唔知呢啲算唔算係英式幽默呢？
