我喺幼稚園既休息室收data，入面有張床，俾小朋友唔舒服時休息……
帶小朋友入去，小朋友大叫：「嘩！謝老師呢度喺你屋企嚟架？」
我：「梗係唔係啦…」
小朋友：「你張床都喺度喎……」
我：「你要叮噹、史迪仔、winnie the pooh定little twins stars 貼紙啊？」
小朋友：「我最鐘意多啦美，我爸爸就鐘意多啦A夢。」
我：「咁我送五個多啦美俾你啦⋯⋯我得返四個多啦美咋喎，你不如㨂一個多啦A夢送俾爸爸吖！」
小朋友㨂一大輪，揀佐一個雪榚貼紙。
我：「咦，你做乜唔㨂個多啦A夢俾爸爸既？」
小朋友：「 其實我爸爸最鐘意就係食野，佢成日偷食架！」」
我問小女孩： 「你要叮噹、史迪仔、winnie the pooh定little twins stars 貼紙啊？」
小女孩：「叮噹入面有冇技安架？」
我：「吓？有啊（技安大把，無小朋友㨂⋯⋯）你想要技安？」
小女孩：「係啊！我最鐘意技安。」
我：「吓？點解啊？」
小女孩：「佢唱歌好好聽！ 」
我：「呃，但係佢成日蝦大雄喎⋯」
小女孩：「我都唔鐘意大雄既，佢咁懶！」
小朋友： 「謝老師你做乜咁耐都唔返黎探我哋？上次已經係聖誕節！」
我：「我要做功課吖嘛⋯」
小朋友：「 你做乜要做功課架？」
我：「我讀大學吖嘛⋯⋯」
小朋友：「乜嘢大學啊？小學啊嘩，哈哈哈哈你好搞笑啊⋯⋯ -___-|||」
（小朋友似乎認真唔知乜野係大學以我為亂講搞笑）
畢業典禮前一星期返幼稚園，見到惜字如金小朋友，難得佢主動問：「謝老師，你讀完大學嗱？」
我：「未讀完啊，就黎讀完⋯⋯」
小朋友：「仲有幾多個星期啊？」
我：「十幾個星期啦⋯⋯」
小朋友： 「咁耐！我都讀完幼稚園嘞喎！！」
