最近因為研究「玩」，和小朋友玩了一整個下午。
在一個為小孩而設的遊樂場，很多設施對大人來說都很難玩。主要是因為大人的體形較龐大：太高，很多時要彎腰；太胖，有時很難穿過障礙。還有，有部份地方是要爬過隧道的，小朋友爬得超快，大人爬得較慢而且膝蓋會很痛……
當我在一個繩網附近觀察，一個小男孩拍拍我。
小男孩：姐姐我哋一齊爬上去吖！
我：呃，我可能爬唔到喎。
小男孩：點解啊？
我：我咁肥可能穿唔過喎。（主因是我在寫研究記錄，沒時間玩，所以打算隨便說個原因。）
小男孩鼓勵我：你試下啦！
看到小男孩殷切的目光，我屈服了，於是放下記錄板，爬入繩網。
小男孩興奮大叫：嗱！你咁肥都穿得過㗎！
（我覺得他超級sweet和可愛，不過他媽媽就覺得超級尷尬。）
後來，有個小女孩在繩網上做拱橋。她的兩個朋友在旁邊做一字馬。那時我已經做完記錄，可以和她們吹水。
我：嘩好勁啊，你哋學體操架？
小女孩一：唔係啊，我哋學跳舞架。呢個好易咋喎，嗱。（一邊示範一邊講嘢）你好似我咁向後彎就得架嘞。
我：唔得啦，我啲腰骨硬晒架啦（我向前彎）你睇下我淨係可以彎咁多咋，完全掂唔到腳趾啊。
小女孩二：咦，乜會掂唔到架？（立即向前彎完全掂到腳趾）我掂到啊。
小女孩三：（又試）我都得喎。
小女孩一：咁啊，你一係試下做一字馬啦，易啲架。嗱（輕易做出一字馬。）
我：我做唔到架，嗱。（我稔得一百四十度左右，同埋我估拱橋應該易過一字馬？）
小女孩二：唔緊要，我哋玩其他嘢啦。
然後三個小女孩喺繩網度碌嚟碌去，叫我一齊碌，之後又喺我附近彈嚟彈去，一樣玩得好開心。
其實，很多時和小朋友玩，他們都會想我做一些我說做不到到的事（能力做不到或我在工作，沒時間做），例如做一字馬，捐隧道去扮怪獸追佢哋……但他們也只是很誠懇地鼓勵我去試，而沒有勉強我做。
相反，經常見到大人覺得自己做到的事小朋友都做到，又或者其他小朋友做到的事自己的小朋友也會做到，於是會強迫小朋友做。
就好像以下這個平衡木：
這裏經常出現conflict，通常是驚青家長不停叫小朋友小心 ，又或是大膽家長強迫小朋友試行。
其中一句聽得最多的話就是：「你睇，嗰個小朋友細過你都得，唔駛驚喎！」
老老實實，我第一次行這條平衡木都驚驚地架，不過見好多細路咁高都直接跳落黎，另一個職員話大人行條木都唔會斷，我先敢行。於是，當家長不停叫小朋友唔駛驚，我就會邀請家長行一次，等佢哋感受下其實真係會有少少驚。於是就出現呢一幕：
一位爸爸猛叫個大約五歲既女行。
我提議：爸爸，你不如試下行吖！
爸爸臉色一變：吓，唔係小朋友先行得架？我驚會斷啊！
我同另一個男職員：我哋都行過啊，無事架。
爸爸：我二百二十幾磅喎！
男職員：我都二百磅架！
我附和：你見好多小朋友跳落黎都無事，你有心理準備佢會斷，其實都應該ＯＫ既。
女兒一邊行去平衡木下面一邊鼓勵：你試啦，我幫你扶住條平衡木。
女兒之後跕高腳，又跳高，其實都掂唔到條木。
爸爸見到個女咁興奮：好咁我試下……
於是爸爸兜去平台另一邊既斜台行上去平台，唔直接爬梯上，我哋明明喺喺梯下面傾緊計……
我：做乜唔直接爬梯上要兜咁遠啊？
爸爸：嗰邊矮啲吖嘛
我：都爭唔夠20cm -__-
爸爸上到平台，仲要放低個書包，先慢慢行上條木，然後成功行返去梯嗰邊。女兒超級興奮：好嘢！得佐啊！
然後，女兒同有幾個唔敢行既小朋友睇住呢位爸爸行完，之後佢哋就爭住行嘞。
看起來，在玩的時候，小朋友比很多大人講道理和體諒別人，和樂於鼓勵別人。還有，小朋友玩的時候真的可以學習不少社交和情緒技巧。希望學校家長和社會可以給小朋友玩的空間。
