小女孩同我講：「嘉嘉好鐘意小明架！嘻嘻⋯⋯ 」（之前嘉嘉都有同我講過佢鐘意小明）
小明：「唔好再講啦，我同佢無可能架！」
我：「吓？乜嘢無可能啊？」
小明：「嘉嘉高過我，我唔可以同佢結婚架。」
我：「點解高過你就唔可以結婚啊？」
小明：「我媽媽話男仔一定要高過女仔架！」
我：「咁你爸爸係咪高過你媽媽架？」
小明：「梗係啦！我媽媽好矮架，我都就黎高過佢啊！我去到佢呢度嘞～」（比劃自己個心口）
今日返幼稚園，第一個見到我既小朋友大叫「謝老師！生日快樂！」之後全班大叫「謝老師！生日快樂！」
我同第一個小朋友講：「多謝，不過唔係我生日喎⋯⋯」
小朋友：「你明明話過你同我一樣係八月生日架喎！」
我：「係啊，依家七月喎。」
小朋友：「今次係七月同八月小朋友既生日會啊！」
我：「咁我唔係小朋友吖嘛，今次係你既生日會喎！生日快樂啊～」
小朋友： 「咁你幾時有生日會啊？」
小朋友同我分享面試經歷：「個老師問我：『如果你唔見佐媽咪，你會點做啊？』」
我：「咁你點答啊？」
小朋友（大叫）：「救命啊！仲嚇親個老師～」（都嚇親我）
我剪短佐頭髮，小男孩見到我，大叫：「謝老師！你做乜變成咁啊！！」
我：「變成點啊？」
小男孩：「薯仔頭！」
我：「乜嘢係薯仔頭啊？」
小女孩：「咩啊，邊有薯仔頭㗎！係冬菇頭啊！」
我： 「我呢個都唔係冬菇頭⋯⋯冬菇頭係咁架！」（我用手在額頭比劃）
小女孩：「我都係鐘意你長頭髮多啲，長頭髮先係公主頭！」
小女孩二、三：「係囉，我都鐘意你長頭髮公主頭多啲！！」
小男孩：「我鐘意Ironman頭多啲⋯⋯」
剪短頭髮第二日，因為唔長唔短既髮型真係好鬼熱，所以夾硬紮起佐啲頭髮。
小男孩：「你今日又變返之前咁喎！」
小女孩一：「唔係囉，仲係短過之前好多，你做乜扮長頭髮！」…
