喺禮堂圓桌早會，全部人一邊食早餐一邊聽校長講嘢。
男仔Ａ將枱面啲牛角包碎掉到坐佢隔離既男仔Ｂ頭頂，因為男仔Ｂ背住男生Ａ專心咁聽緊書同睇緊powerpoint，所以佢完全唔知。
男仔Ａ見佢完全唔知，就繼續掉啲牛角包碎喺男仔Ｂ頭頂，旁邊既人都喺都忍笑，我見其他老師見到都無出聲，咁我都只係圍觀忍笑，稔緊到底男仔Ｂ幾時會發現。
結果，男仔Ａ將枱面所有牛角包碎都掉晒上男仔Ｂ個頭，男仔Ｂ都仲係無反應。
跟住小組討論，同組既人見到男仔Ｂ成頭牛角包碎，都喺扮無嘢。最後，有個女仔忍唔住：「你個頭上面有啲牛角包碎啊。」
男仔Ｂ撥頭髮，跟住就有好多牛角包碎飛落地，好似落雪咁，佢驚訝：「乜料，唔好意思，我都唔知我點食到啲碎去晒頭頂。」
我哋忍唔住爆笑，男仔Ｂ都笑埋一份。
無人踢爆男仔Ａ。
到差唔多落堂……
男仔Ａ忍唔住，同男仔Ｂ講：「其實啲牛角包碎係我放喺你頭頂架……」
男仔Ｂ無奈：「ＷＴＨ……駛唔駛放咁多啊……」
男仔Ａ：「鬼知你咁留心放咁多你都唔知咩。」
點解我同其他老師見到都無聲？
因為男仔Ａ差唔多三十歳，男仔Ｂ差唔多四十歳——佢哋係英文老師。以上既事係發生喺校務發展日。
有時我哋話啲學生好似小學生，其實啲老師有時都好似小學生。
定喺佢哋嗰朝唔係飲咖啡而喺飲啤酒呢？
趕住去上堂，推開門行出去聽到後面有人講「唔該」，我擰轉頭見到副校長，我話：「唔駛唔該，我乜都無做過。」
副校長：「係啊，我係諷刺咋，我慣佐有人唔推住度門就會講唔該。」
我：「哎，唔好意思，我唔知你喺我後面。」
副校長：「唔駛唔好意思，我知你唔知我喺你後面，我其實係講笑咋。」
副校長，你咁好難知你幾時係諷刺幾時係講笑架喎。同埋其實我都唔知你邊句係講緊笑，到底係「我係諷刺咋，我慣佐有人唔推住度門就會講唔該。」呢句係講笑吖，定係講「唔該」係講笑呢？
另外，推門等人真係一件好難把握時機既事，如果太早推門又俾到壓力行過呢既人，到底乜嘢距離先唔係太早呢？
