有少少搞笑：同小學生傾計

小朋友看到我的多啦A夢T Shirt，說：「我好鐘意睇多啦A夢㗎！」
我：「係啊？」
小朋友：「我睇過一集㗎！叮噹啊，同大雄呢，同佢呢，鬥快食野，豆沙飽，哈哈，好搞笑！」
我：「咦，點解你知佢叫叮噹嘅？」
小朋友：「我知！因為佢呢度呢，有呢個圓形既野囉！」（指著叮噹的鈴）
我見佢以為我問佢點解叮噹叫叮噹，隨口問：「係喎，咁你知唔知點解佢叫多啦A夢啊？」
小朋友：「知啊！因為佢有好多，好多，好多line line line line！」（用手指著叮噹的大頭打圈。）

小朋友A的家長不知所蹤，我帶著小朋友A跟下一個接受測試的小朋友B家長說要請她稍等一下。
小朋友A見到小朋友B，興奮叫道：「你咪係我幼稚園同學？」
小朋友B：「係咩？」
小朋友A：「吓，你唔認得我嗱？」
小朋友B：「唔記得喎….（扯開話題）我讀1A㗎。」
小朋友A：「我又係喎！」（佢哋兩個唔同小學）
小朋友B：「咁你識唔識XYZ啊，佢都係1A㗎。」
小朋友A：「唔識喎。」

（七分鐘後….)

小朋友B：「我間小學個厠所好污糟啊（以下省略，形容過份仔細）。都係幼稚園個厠所好啲，我讀XYZ幼稚園㗎。」
小朋友A：「咁啱既，我又係喎。」

小朋友做工作紙，將工作紙翻到下一頁，高呼：「嘩，咁easy！」
我：「咁快就話easy？你未開始做喎。」
小朋友：「唔係啊，我話『近義詞』啊！」
（工作紙的題目是近義詞…）

一個小朋友下午二時開始做測試，到三時許，她問：「幾時完架？我趕時間啊！」
我：「乜事咁趕啊？」
她：「我一陣要學游水！」
我：「幾點？」
她：「七點半啊！」
我：「依家三點咋喎。」
她：「咁我要去食麥當勞，食完野又唔可以即刻游水，差唔多啦……」